மதுரை, திண்டுக்கல்லை அதிரவைத்த ரூ.100 கோடி மெகா ஸ்கேம்…. 10,000 பேர் புகார்… களத்தில் இறங்கிய போலீஸ்…. வெளிவந்த திடுக்கிடும் உண்மை…!

மதுரை மற்றும் திண்டுக்கல் மாவட்டங்களில் கிரிப்டோ கரென்சி பெயரில் நடைபெற்ற பிரம்மாண்ட நிதி மோசடி சம்பவம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. ‘FQL Exchange’ மற்றும் ‘VG Investment’ ஆகிய ஆன்லைன் செயலிகள் மூலம் ரூ.50,000 முதலீடு செய்தால் இரண்டே மாதங்களில் இரட்டிப்பு லாபம் பெறலாம் என ஆசைவார்த்தை கூறி, சுமார் 15,000-க்கும் மேற்பட்ட பொதுமக்கள் ஏமாற்றப்பட்டுள்ளனர். இதுவரை சுமார் 10,000 பேர் காவல் துறையில் அதிகாரப்பூர்வமாக புகார் அளித்துள்ள நிலையில், மோசடி செய்யப்பட்ட தொகை ரூ.100 கோடியைத் தாண்டும் எனக் கருதப்படுகிறது.

திண்டுக்கல் மாவட்டம் நத்தம் காசம்பட்டியைச் சேர்ந்த இளையராஜா மற்றும் அவர்தம் கிராம மக்கள் பலரின் பெயர்களில் போலியான ஐடிக்களை (ID) உருவாக்கிய மோசடிக் கும்பல், கணினித் திரையில் USDT எனும் டிஜிட்டல் கரன்சி வரவு வைக்கப்பட்டது போல் காட்டி நம்பவைத்துள்ளது. ஆனால், பொதுமக்கள் தங்கள் முதலீட்டுத் தொகையைத் திரும்பப் பெற முயன்றபோது பணத்தை எடுக்க முடியாமல் ஏமாற்றப்பட்டதோடு, இறுதியாக அந்தச் செயலிகளும் முற்றிலும் முடக்கப்பட்டன. இதனால் தங்களின் வாழ்நாள் சேமிப்பை இழந்து ஏமாந்த மக்கள் திண்டுக்கல் மாவட்ட குற்றப்பிரிவு காவல் துறையை நாடினர்.

இச்சம்பவம் தொடர்பாக திண்டுக்கல் மாவட்ட குற்றப்பிரிவு போலீசார் ரமேஷ், விஜய், அனிதா, தீனதயாளன், பிரியதர்ஷினி, ரஞ்சித், அருண், கஜேந்திரன், திருமலை மற்றும் ஆண்டிச்சாமி ஆகிய 10 பேர் மீது பாரதிய நியாய சன்ஹிதா (BNS) சட்டப்பிரிவுகள் 340, 316(2), 318(4) மற்றும் தகவல் தொழில்நுட்பச் சட்டம் பிரிவு 66(d)-ன் கீழ் வழக்குப் பதிவு செய்துள்ளனர். முதற்கட்ட நடவடிக்கையாக ரமேஷ், விஜய் மற்றும் அனிதா ஆகிய மூவர் கைது செய்யப்பட்டனர்.

மேலும், இத்திட்டத்தில் சப்-ஏஜென்ட்டுகளாகச் செயல்பட்டு மக்களைச் சேர்த்த மூங்கில்பட்டியைச் சேர்ந்த வீரமணி மற்றும் காசம்பட்டியைச் சேர்ந்த விஜயன், ஜெயபிரகாஷ், சுரேஷ், பிரேம்நாத், மகாதேவன் ஆகிய அறுவரையும் குற்றப்பிரிவு போலீசார் கைது செய்து தீவிர விசாரணை நடத்தி வருகின்றனர். இவர்களது பின்னணியில் உள்ள அமைப்புகள் மற்றும் பாதிக்கப்பட்டவர்களின் முழுமையான விவரங்களைச் சேகரிக்கும் பணியில் காவல் துறையினர் ஈடுபட்டுள்ளனர்.

இதனிடையே, இவ்வழக்கின் முக்கிய குற்றவாளிகளான ரஞ்சித் மற்றும் பிரியதர்ஷினி திண்டுக்கல் நீதிமன்றத்தில் சரணடைந்த நிலையில், அவர்களை மதுரையில் இருந்து வந்த பொருளாதார குற்றப்பிரிவு போலீசார் கைது செய்தனர். தற்போது, பொதுமக்கள் பலரின் பணத்தைச் சுருட்டிப் பெரும் மோசடியில் ஈடுபட்ட இந்த முதன்மை குற்றவாளிகளான ரஞ்சித் மற்றும் பிரியதர்ஷினி ஆகிய இருவர் மீதும் குண்டர் தடுப்புச் சட்டம் பாய்ந்துள்ளதாகக் காவல் துறை அதிகாரப்பூர்வமாக அறிவித்துள்ளது.