திருவனந்தபுரத்தில் நீண்ட காலமாகக் காதலித்து வந்த இளம்பெண்ணை கரம் பிடிக்க இருந்த தருணத்தில், இளைஞர் ஒருவர் சாலை விபத்தில் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. செம்பழந்தி பகுதியைச் சேர்ந்த 28 வயதான ராகேஷ் என்பவரும், காட்டாயிகோணம் பகுதியைச் சேர்ந்த இளம்பெண்ணும் பல ஆண்டுகளாக உயிருக்குயிராகக் காதலித்து வந்தனர். இவர்களது காதலுக்குப் பெற்றோர்கள் கடும் எதிர்ப்பு தெரிவித்த போதிலும், தங்களது காதலைத் திருமணத்தின் மூலம் உறுதிப்படுத்த அவர்கள் முடிவு செய்தனர்.
அதன்படி நேற்று அதிகாலை கோவிலில் திருமணம் செய்துகொண்டு, பின்னர் வாடகை வீட்டில் தங்களது புதிய வாழ்க்கையைத் தொடங்க அவர்கள் திட்டமிட்டிருந்தனர். ஆனால், விதி வேறு விதமாக விளையாடியது. தனது திருமண வேலைகளுக்காக அதிகாலையிலேயே மோட்டார் சைக்கிளில் ராகேஷ் சென்று கொண்டிருந்தார். அப்போது எதிர்பாராத விதமாக எதிரே வந்த கேரள அரசு மின்சாரப் பேருந்து ராகேஷின் பைக் மீது மோதியதில், அவர் சம்பவ இடத்திலேயே பரிதாபமாக உயிரிழந்தார்.
மணக்கோலம் காண வேண்டிய நேரத்தில், மணமகன் ரத்த வெள்ளத்தில் உயிரிழந்த செய்தி கேட்டு உறவினர்களும், அவரது காதலியும் நிலைகுலைந்து போயுள்ளனர். இந்த விபத்து குறித்து வழக்குப் பதிவு செய்துள்ள காவல்துறையினர் தீவிர விசாரணை மேற்கொண்டு வருகின்றனர். மகிழ்ச்சியில் திளைக்க வேண்டிய திருமண நாள், ஒரு கண நேர விபத்தால் மரண ஓலமாக மாறியது அந்த கிராமத்தையே சோகத்தில் ஆழ்த்தியுள்ளது.