தமிழக அரசியலில் பெரும் பரபரப்பை ஏற்படுத்தியிருந்த தவெக ஆதரவு விவகாரம், தற்போது மன்னார்குடி எம்எல்ஏ காமராஜ் அமமுகவிலிருந்து நீக்கப்படும் நிலைக்குத் தள்ளியுள்ளது. இன்று தமிழக சட்டசபையில் சபாநாயகர் ஜே.சி.டி. பிரபாகரனை வாழ்த்திப் பேசிய காமராஜ், “கடந்த சில நாட்களாக சில கசப்பான சம்பவங்கள் நடந்து முடிந்திருந்தாலும், தமிழக வெற்றிக் கழகத்திற்கு (தவெக) எனது முழு ஆதரவைத் தருகிறேன்” என்று பகிரங்கமாக அறிவித்தார். கட்சியின் நிலைப்பாட்டிற்கு எதிராகச் செயல்பட்ட இந்த அதிரடிப் பேச்சால், அமமுக பொதுச்செயலாளர் டி.டி.வி. தினகரன் அவரை கட்சியின் அடிப்படை உறுப்பினர் உள்ளிட்ட அனைத்துப் பொறுப்புகளிலிருந்தும் நீக்கி உத்தரவிட்டுள்ளார்.
இது தொடர்பாக டி.டி.வி. தினகரன் வெளியிட்டுள்ள அறிக்கையில், காமராஜின் செயல் கட்சியின் கொள்கைகளுக்கும் கோட்பாடுகளுக்கும் முற்றிலும் முரணானது எனக் குறிப்பிட்டுள்ளார். கட்சியின் வெற்றிக்காகப் பாடுபட்ட தொண்டர்களுக்கும், மன்னார்குடி தொகுதி மக்களுக்கும் காமராஜ் மிகப்பெரிய துரோகத்தைச் செய்துவிட்டதாக அவர் சாடியுள்ளார். தன்னிச்சையாகச் செயல்பட்டு கழகத்தின் கண்ணியத்திற்கு மாசு ஏற்படுத்திய காரணத்தாலேயே இந்த ஒழுங்கு நடவடிக்கை எடுக்கப்பட்டுள்ளதாக அவர் விளக்கம் அளித்துள்ளார்.
முன்னதாக, தவெக தலைவர் விஜய்யின் ஆட்சி அமைய காமராஜ் ஆதரவு அளிப்பதாக ஒரு வீடியோ வெளியாகி சர்ச்சையை ஏற்படுத்தியது. அந்த வீடியோ ‘செயற்கை நுண்ணறிவு’ (AI) மூலம் உருவாக்கப்பட்ட போலி வீடியோ என்று டி.டி.வி. தினகரன் மறுப்பு தெரிவித்ததோடு, அதுகுறித்து காவல்துறையிலும் புகார் அளித்திருந்தார். அப்போது செய்தியாளர் சந்திப்பில் உடனிருந்த காமராஜும், அந்த வீடியோ போலி என்றும் தான் கையெழுத்திடவில்லை என்றும் கூறியிருந்தார். மேலும், செய்தியாளர்களின் அடுக்கடுக்கான கேள்விகளால் ஆவேசமடைந்த அவர், விஜய்யிடம் பேட்டி எடுக்க முடியுமா என்று சவால் விட்டதுடன், தனது பதவியை ராஜினாமா செய்யப்போவதாகவும் கூறி பரபரப்பை ஏற்படுத்தியிருந்தார்.
இந்நிலையில், இன்று சட்டசபையில் யாரும் எதிர்பாராத விதமாக காமராஜ் தவெகவுக்கு ஆதரவு தெரிவித்திருப்பது அரசியல் வட்டாரத்தில் பெரும் திருப்பமாகக் கருதப்படுகிறது. தேர்தல் முடிவுகளில் பெரும்பான்மை கிடைக்காத நிலையில், தவெக ஆட்சி அமைப்பதில் நிலவி வந்த இழுபறியில் காமராஜின் இந்த ஆதரவு முக்கியத்துவம் பெறுகிறது. அதே நேரத்தில், குதிரை பேரம் நடப்பதாக தினகரன் குற்றம் சாட்டி வரும் நிலையில், காமராஜின் இந்த திடீர் மனமாற்றம் அமமுக தொண்டர்களிடையே அதிர்ச்சியை ஏற்படுத்தியுள்ளது. இதன் மூலம் தவெக – அமமுக இடையிலான அரசியல் மோதல் அடுத்த கட்டத்தை எட்டியுள்ளது.