நீட் தேர்வில் நடைபெற்ற முறைகேடுகளுக்குப் பொறுப்பேற்று மத்திய கல்வி அமைச்சர் தர்மேந்திர பிரதான் பதவி விலகக் கோரி, ‘காக்ரோச் ஜனதா கட்சி’ அமைப்பைச் சேர்ந்த இளைஞர்களும் மாணவர்களும் 30 நாட்களுக்கும் மேலாகத் தொடர் போராட்டங்களில் ஈடுபட்டனர். உச்ச நீதிமன்ற தலைமை நீதிபதியின் பேச்சைத் தொடர்ந்து அபிஜித் தீப்கே போன்ற இளைஞர்களால் தொடங்கப்பட்ட இக்கட்சிக்கு சமூக ஆர்வலர் சோனம் வாங்சுக்கும் ஆதரவளித்தார். காவல்துறையின் தடியடி மற்றும் கண்ணீர் புகை வீச்சையும் கடந்து மாணவர்கள் உறுதியுடன் போராடியதன் விளைவாக, தர்மேந்திர பிரதான் தனது பதவியை ராஜினாமா செய்தார். இதனைப் போராட்டக்காரர்கள் தங்களின் பெரும் வெற்றியாகக் கொண்டாடினர்.
இந்நிலையில், நிறுவனத்தின் நிறுவனரான ஸ்ரீதர் வேம்பு, தர்மேந்திர பிரதானின் பதவி விலகலுக்கு வருத்தம் தெரிவித்து தனது ‘எக்ஸ்’ தளத்தில் பதிவொன்றை வெளியிட்டுள்ளார். அதில், பிரதான் மிகச்சிறந்த பொது ஊழியர் என்றும், நாட்டின் இளைஞர்கள் மற்றும் கிராமப்புற மாணவர்களின் நலன் மீது மிகுந்த அக்கறை கொண்டவர் என்றும் குறிப்பிட்டுள்ளார். மேலும், நாட்டின் நலனுக்காகச் சுயநலமின்றி அவர் எடுத்த இந்த முடிவால் அவர் மீதான மரியாதை கூடியுள்ளதாகக் கூறிய வேம்பு, அவரது சேவைக்கு நன்றியும் தெரிவித்தார்.
இருப்பினும், ஸ்ரீதர் வேம்புவின் இந்தப் பதிவு சமூக வலைத்தளங்களில் கடுமையான விமர்சனங்களைச் சந்தித்து வருகிறது. ஆயிரக்கணக்கான மாணவர்கள் மற்றும் இளைஞர்களின் ஒரு மாத காலப் போராட்ட வெற்றியை, பிரதானை உயர்த்திப் பேசுவதன் மூலம் அவர் அவமதிக்கிறாரோ என்ற சந்தேகம் பொதுமக்கள் மத்தியில் எழுந்துள்ளது. இதன் காரணமாக, பல இணையவாசிகள் ஸ்ரீதர் வேம்புவின் கொள்கை மற்றும் சித்தாந்தங்களைக் கேள்விக்குள்ளாக்கி, அவரது பதிவின் கருத்துப் பிரிவில் தங்களது எதிர்ப்பைப் பதிவிட்டு வருகின்றனர்.