திருப்பூர் மாவட்டம் தாராபுரம் தனித்தொகுதி இடைத்தேர்தல் வாக்கு எண்ணிக்கையில், மின்னணு வாக்குப்பதிவு இயந்திரங்கள் (EVM) திறக்கப்பட்டதிலிருந்து அரசியல் களம் சூடுபிடித்துள்ளது. தபால் வாக்குகளில் தமிழக வெற்றிக் கழகம் முன்னிலை பெற்றிருந்த நிலையில், இயந்திர வாக்குகள் எண்ணப்பட்டபோது அதிமுக வேட்பாளர் கே. பானுமதி 9308 வாக்குகள் பெற்று முதலிடத்திற்கு முன்னேறியுள்ளார். தவெக வேட்பாளர் பி. சத்யபாமா 8977 வாக்குகளுடன் இரண்டாம் இடத்திலும், திமுக வேட்பாளர் எஸ். சுகன்யா 7098 வாக்குகளுடன் மூன்றாம் இடத்திலும் உள்ளனர். ஆளும் தவெக-வைவிட 331 வாக்குகள் வித்தியாசத்தில் அதிமுக தொடர்ந்து முன்னிலை வகித்து வருவது அரசியல் வட்டாரத்தில் பெரும் விவாதத்தை ஏற்படுத்தியுள்ளது.
தாராபுரம் ஒரு பட்டியலின (SC) தனித்தொகுதியாக இருந்தாலும், இத்தொகுதியின் வெற்றியைத் தீர்மானிப்பதில் கொங்கு வேளாள கவுண்டர் சமூகத்தின் வாக்குகள் முக்கியப் பங்கு வகிக்கின்றன. இங்கு மொத்த வாக்காளர்களில் பட்டியலின மக்கள் 28 சதவீதம் வரை இருந்தாலும், கவுண்டர் சமூக மக்கள் 35 முதல் 40 சதவீதத்திற்கும் அதிகமான வாக்குகளைக் கொண்டுள்ளனர். இவர்களுடன் நாயக்கர், செட்டியார் மற்றும் சிறுபான்மையின வாக்குகளும் பரவலாக உள்ளன. பாரம்பரியமாக கவுண்டர் சமூக வாக்குகளை அதிகம் ஈர்ப்பவர்களுக்கே தாராபுரத்தில் வெற்றி வாய்ப்பு கிடைக்கும் என்பதால், இத்தொகுதி தேர்தல் களம் அனைத்துக் கட்சிகளுக்கும் எப்போதும் சவாலானதாகவே பார்க்கப்படுகிறது.
இந்தச் சாதி சமன்பாட்டைச் சாதகமாக்க, தவெக தலைவர் விஜய் தேர்தல் பிரச்சாரத்தின் இறுதியில் மூலனூர் வஞ்சியம்மன் கோயிலுக்கு நேரில் சென்று வழிபாடு நடத்தியது பெரும் கவனத்தைப் பெற்றது. கொங்கு வேளாள கவுண்டர்கள் மற்றும் செட்டியார் சமூகத்தினரின் மிக முக்கிய குலதெய்வக் கோயிலான இத்தலத்திற்கு விஜய் சென்றது, அப்பகுதி மக்களின் வாக்குகளைத் தவெக பக்கம் திருப்பும் வியூகமாகக் கருதப்பட்டது. இருப்பினும், தற்போதைய இவிஎம் முடிவுகள் அந்த ஆன்மீக-அரசியல் நகர்வு எதிர்பார்த்த தாக்கத்தை ஏற்படுத்தவில்லை என்பதையே காட்டுகின்றன. எடப்பாடி பழனிசாமி மீதான கொங்கு மக்களின் சமுதாயப் பிணைப்பும், இரட்டை இலை சின்னத்தின் பாரம்பரிய பலமும் அதிமுகவின் வாக்கு வங்கியைச் சிதறடிக்காமல் பாதுகாத்துள்ளன.
சொந்தச் சமுதாயத் தலைவரான எடப்பாடி பழனிசாமி மீது அப்பகுதி மக்கள் கொண்டுள்ள நம்பிக்கையே அதிமுகவின் இந்த ஆரம்பகட்ட முன்னிலைக்குக் முக்கியக் காரணமாகக் கூறப்படுகிறது. தவெக தலைமை முன்னெடுத்த அதிரடி வியூகங்களை முறியடித்து, தாராபுரக் கிராமப்புற வாக்குச்சாவடிகளில் அதிமுக வேட்பாளர் முன்னிலை பெறுவது தவெகவிற்கு ஒரு புதிய சவாலாக உருவெடுத்துள்ளது. எனினும், இரு கட்சிகளுக்கும் இடையே மிகக் குறைவான வாக்கு வித்தியாசமே உள்ளதால், நகர்ப்புற வாக்குகள் மற்றும் வரும் சுற்றுகளில் நிலவரம் மாறுமா என்ற எதிர்பார்ப்பும் விறுவிறுப்பும் தேர்தல் களத்தில் தொடர்ந்து நீடிக்கிறது.