தமிழகத்தில் அரை நூற்றாண்டுக்கும் மேலாக திமுக, அதிமுக ஆகிய இரு திராவிடக் கட்சிகளே மாறி மாறி ஆட்சிப் பொறுப்பேற்று வந்துள்ளன. இந்த நிலையில், 2024-இல் ‘தமிழக வெற்றிக் கழகம்’ என்ற கட்சியைத் தொடங்கி அரசியல் களத்தில் நுழைந்த நடிகர் விஜய், அதைத் தொடர்ந்து வந்த தேர்தலில் முதலமைச்சராகப் பொறுப்பேற்று அனைவரது கவனத்தையும் ஈர்த்தார். இந்த அரசியல் மாற்றம் திரைத்துறையில் முன்னணி நடிகர்களாக இருக்கும் சூர்யா, தனுஷ், சிவகார்த்திகேயன், விஜய் சேதுபதி உள்ளிட்ட பலரின் கவனத்தை அரசியல் பக்கம் திருப்பியதாகப் பேச்சுக்கள் எழுந்தன.
தற்போது இவர்களில் முதல் ஆளாக நடிகர் தனுஷ் அரசியலில் தடம் பதிக்கவுள்ளார் என்ற செய்தி சமூக வலைதளங்களில் மிக வேகமாகப் பரவி வருகிறது. தனுஷ் ரசிகர் மன்றத்தின் சார்பில் சமீபத்தில் புதிய கொடி அறிமுகப்படுத்தப்பட்டது ரசிகர்களிடையே பெருத்த வரவேற்பைப் பெற்றுள்ளது. மாவட்ட மற்றும் ஒன்றிய அளவில் ரசிகர் மன்றத்தின் நற்பணி இயக்கக் கட்டமைப்பை வலுப்படுத்தி, எதிர்காலத்தில் அதை ஒரு வலுவான அரசியல் அடித்தளமாக மாற்றுவதற்கான முதற்கட்ட ஆலோசனைகள் தீவிரமாக நடைபெற்று வருவதாகக் கூறப்படுகிறது.
இதன் தொடர்ச்சியாக, அகில இந்திய தனுஷ் ரசிகர் நற்பணி மன்றத்தை ஒரு முழுமையான அரசியல் இயக்கமாக உருமாற்றும் பணிகள் முடுக்கி விடப்பட்டுள்ளன. இதற்காக மாவட்ட வாரியாகப் புதிய நிர்வாகிகள் நியமிக்கப்பட்டு, புதிய உறுப்பினர்கள் சேர்க்கையும் தீவிரப்படுத்தப்பட்டு வருகிறது. மேலும், இந்தியத் தலைமைத் தேர்தல் ஆணையத்தில் புதிய அரசியல் கட்சியைப் பதிவு செய்ய தனுஷ் தரப்பில் இருந்து விண்ணப்பிக்கப்பட்டுள்ளதாகத் தகவல்கள் வெளியாகியுள்ளன.
‘தமிழக எழுச்சிக் கழகம்’ என்ற பெயர் இப்புதிய கட்சிக்குச் சூட்டப்பட்டுள்ளதாகக் கூறப்படும் நிலையில், விரைவில் இதுகுறித்த அதிகாரப்பூர்வ அறிவிப்பை தனுஷ் வெளியிடுவார் என்று எதிர்பார்க்கப்படுகிறது. இருப்பினும், தனுஷ் தரப்பில் இருந்து இதுவரை எந்தவொரு அதிகாரப்பூர்வ அறிவிப்பும் வரவில்லை என்பதால், அவரது அடுத்தகட்ட நகர்வுகள் என்னவாக இருக்கும் என்ற பெரும் எதிர்பார்ப்பும் சுவாரசியமும் ரசிகர்கள் மற்றும் அரசியல் வட்டாரத்தில் நிலவி வருகிறது.