2026 தமிழக சட்டமன்றத் தேர்தல் களம் சூடுபிடித்துள்ள நிலையில், திமுக கூட்டணியில் நிலவும் சலசலப்புகளுக்கு இடையே தமிழக வெற்றிக் கழகத் தலைவர் விஜய் விடுத்துள்ள அதிரடித் தூது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. திமுக கூட்டணியில் தொகுதிப் பங்கீடு மற்றும் அதிகாரப் பகிர்வு தொடர்பாக விடுதலைச் சிறுத்தைகள் கட்சி (விசிக) மற்றும் திமுக இடையே இழுபறி நீடித்து வருவதாகக் கூறப்படும் சூழலில், விசிக-வை தங்கள் பக்கம் இழுக்க தவெக தீவிர முயற்சி மேற்கொண்டு வருவதாகத் தெரிகிறது.
குறிப்பாக, விசிக – தவெக கூட்டணியுடன் கைகோர்த்தால் அக்கட்சியின் தலைவர் திருமாவளவனுக்கு ‘துணை முதல்வர்’ பதவி வழங்கப்படும் என்று விஜய் தரப்பில் உறுதி அளிக்கப்பட்டதாகக் கூறப்படுகிறது. இந்தத் தகவலை விசிக மாணவரணி துணைச் செயலாளர் நெப்போலியன் ஒரு நேர்காணலில் வெளிப்படையாகத் தெரிவித்துள்ளார். “ஆட்சியில் அதிகாரம், அதிகாரத்தில் பங்கு” என்ற கோரிக்கையைத் தொடர்ந்து முன்வைத்து வரும் திருமாவளவனுக்கு, விஜய்யின் இந்த ‘துணை முதல்வர்’ வாக்குறுதி ஒரு மிகப்பெரிய அரசியல் தூண்டிலாகப் பார்க்கப்படுகிறது.
ஏற்கனவே திமுக கூட்டணியில் தங்களுக்கு உரிய முக்கியத்துவம் அளிக்கப்படவில்லை என்ற அதிருப்தியில் விசிக இருப்பதாகக் கருதப்படும் நிலையில், விஜய்யின் இந்த அதிரடித் திட்டம் தமிழக அரசியல் களத்தில் புதிய திருப்பத்தை ஏற்படுத்தியுள்ளது. தவெக விரித்துள்ள இந்த வலை விசிக-வை ஈர்க்குமா அல்லது திமுக தனது கூட்டணியைத் தக்கவைக்க மாற்றுத் திட்டம் வகுக்குமா என்பது வரும் நாட்களில் தெரியவரும். இந்த அதிகாரப் போட்டி 2026 தேர்தலில் கூட்டணிக் கணக்குகளைத் தலைகீழாக மாற்றக்கூடும் என அரசியல் நோக்கர்கள் உற்று நோக்கி வருகின்றனர்.