தமிழகத்தில் நடைபெறவுள்ள தேர்தலையொட்டி பாஜக வெளியிட்டுள்ள தேர்தல் அறிக்கையில், வறுமைக் கோட்டிற்கு கீழ் உள்ள (BPL) குடும்பங்களைச் சேர்ந்த மாணவிகளுக்காக ஒரு முக்கிய வாக்குறுதி அளிக்கப்பட்டுள்ளது. அதன்படி, இக்குடும்பங்களைச் சேர்ந்த ஒவ்வொரு 8-ஆம் வகுப்பு மாணவியின் பெயரிலும் அரசு சார்பில் ரூ.50,000 வைப்பு நிதி (Deposit) செய்யப்படும். இத்திட்டத்தின் மூலம் பொருளாதாரத்தில் பின்தங்கிய நிலையில் உள்ள இளம் பெண்களின் உயர்கல்வியையும், அவர்களின் எதிர்காலத்தையும் உறுதி செய்ய முடியும் என்று அக்கட்சி தெரிவித்துள்ளது.
பெண் குழந்தைகளின் கல்வி இடைநிற்றலைக் குறைப்பதை நோக்கமாகக் கொண்டு அறிவிக்கப்பட்டுள்ள இத்திட்டத்தில், மாணவிகள் தங்களது 12-ஆம் வகுப்பை வெற்றிகரமாக நிறைவு செய்த பின்னரே இந்த வைப்புத் தொகையைத் திரும்பப் பெற முடியும் என நிபந்தனை விதிக்கப்பட்டுள்ளது. இதற்காக 12-ஆம் வகுப்பு நிறைவுப் பத்திரம் என்ற புதிய முறையும் அறிமுகப்படுத்தப்படும் என அறிக்கையில் கூறப்பட்டுள்ளது. பெண்களின் கல்வி உரிமையை நிலைநாட்டவும், அவர்கள் பள்ளிப் படிப்பை முழுமையாக முடிக்க ஊக்குவிக்கவும் இந்தத் திட்டம் பெரும் உதவியாக இருக்கும் என எதிர்பார்க்கப்படுகிறது.