மத்தியப் பிரதேச மாநிலத்தின் ஹோம் கார்ட்ஸ் பிரிவில் மாவட்ட கமாண்டன்டாகப் பணியாற்றி ஓய்வுபெற்று, 2017-இல் காலமான சங்கர்லால் ஸ்ரீவஸ்தவா என்பவர், தனது விவாகரத்தான மகள் ஜோதி ஸ்ரீவஸ்தவாவைத் தனது குடும்ப ஓய்வூதியத்திற்கான வாரிசாக நியமிக்க விண்ணப்பித்திருந்தார். ஆனால், மத்தியப் பிரதேச அரசு ஊழியர் (ஓய்வூதியம்) விதிகள் 1976-இன் படி, விவாகரத்தான மகள் குடும்ப உறுப்பினராகக் கருதப்பட மாட்டார் எனக் கூறி ஹோம் கார்ட்ஸ் பொது இயக்குநர் (DG) அந்த விண்ணப்பத்தை நிராகரித்தார். இதனை எதிர்த்து ஜோதி ஸ்ரீவஸ்தவா தொடர்ந்த வழக்கை விசாரித்த உயர் நீதிமன்ற நீதிபதி விஷால் தாகத், விவாகரத்தான மகளுக்குக் குடும்ப ஓய்வூதியத்தை மறுப்பது அரசியலமைப்புச் சட்டம் வழங்கியுள்ள அடிப்படைச் சமத்துவ உரிமைக்கு எதிரானது என்று கூறி, அரசு அதிகாரியின் உத்தரவைத் தள்ளுபடி செய்தார்.
இவ்வழக்கை விசாரித்த நீதிபதி, 1976-ஆம் ஆண்டின் ஓய்வூதிய விதிகளின்படி விவாகரத்தான மகள் ‘குடும்பம்’ என்ற வரையறைக்குள் நேரடியாகச் சேர்க்கப்படவில்லை என்றாலும், விதி 44(5)-இன் கீழ் திருமணமான மகள்கள் குடும்ப உறுப்பினர்களாக ஏற்றுக்கொள்ளப்பட்டுள்ளதைச் சுட்டிக்காட்டினார். நீதிமன்றம் தனது தீர்ப்பில், “ஒரு திருமணமான மகள் குடும்பத்தின் உறுப்பினராக இருக்கும்போது, விவாகரத்தான மகள் மட்டும் எப்படி குடும்ப உறுப்பினராக இல்லாமல் போக முடியும்? அரசியலமைப்பின் 14-வது பிரிவின்படி (சமத்துவ உரிமை) திருமணமான மகள், திருமணமாகாத மகள் மற்றும் விவாகரத்தான மகள் ஆகியோருக்கு இடையே எந்தப் பாகுபாடும் காட்ட முடியாது” என்று திட்டவட்டமாகக் கூறியது.
விவாகரத்தான மகள்களைக் குடும்ப உறுப்பினராகக் கருத மறுப்பது சட்டவிரோதம் என்று தீர்ப்பளித்த மத்தியப் பிரதேச உயர் நீதிமன்றம், மனுதாரரின் கோரிக்கையை மீண்டும் பரிசீலிக்குமாறு ஹோம் கார்ட்ஸ் பொது இயக்குநருக்கு உத்தரவிட்டுள்ளது. மனுதாரர் தனது மறைந்த தந்தையைச் சார்ந்துதான் வாழ்ந்தார் என்பது உறுதிசெய்யப்பட்டால், அவருக்குக் குடும்ப ஓய்வூதியம் வழங்கப்பட வேண்டும் என்றும், இந்த மறுபரிசீலனை செயல்முறையை அடுத்த 90 நாட்களுக்குள் (3 மாதங்கள்) முடித்து உரிய உத்தரவைப் பிறப்பிக்க வேண்டும் என்றும் அதிகாரிகளுக்கு நீதிமன்றம் காலக்கெடு விதித்துள்ளது.