புனேயில் வசிக்கும் ஒரு நபரின் வீட்டிற்கு மதிய நேரத்தில் ‘கேஷ் ஆன் டெலிவரி’ (COD) பார்சல் ஒன்று வந்துள்ளது. அதில் கட்டணத் தொகையாக 1,142 ரூபாய் எனக் குறிப்பிடப்பட்டிருந்தது. தான் எதையும் ஆர்டர் செய்யவில்லை என்றாலும், ஒருவேளை வீட்டில் உள்ள மற்றவர்கள் யாராவது ஆர்டர் செய்திருப்பார்கள் என்று நினைத்த அந்த நபர், டெலிவரி ஊழியரிடம் பணத்தைக் கொடுத்து பார்சலைப் பெற்றுக்கொண்டார்.
அந்த பார்சல் பார்ப்பதற்கு மிகவும் அசலாக இருந்தது. பார் கோட், கியூஆர் கோட் மற்றும் பெரிய நிறுவனங்களின் பேக்கிங் முறையிலேயே அது வடிவமைக்கப்பட்டிருந்தது. ஆனால், பார்சலைப் பிரித்துப் பார்த்தபோது அவருக்குப் பெரும் அதிர்ச்சி காத்திருந்தது. பார்சல் கனமாகவும், விலை உயர்ந்த பொருள் உள்ளே இருப்பது போலவும் காட்டுவதற்காக பிளாஸ்டிக், காகிதம் மற்றும் சிறிய பைகள் என அடுத்தடுத்து பல உறைகள் சுற்றப்பட்டிருந்தன. இறுதியில் அதன் உள்ளே கிழிந்த மற்றும் அழுக்கடைந்த பழைய சேலைத் துணி மட்டுமே இருந்தது. அப்போதுதான் தான் ஏமாற்றப்பட்டதை அவர் உணர்ந்தார்.
தற்போது இது போன்ற சிஓடி (COD) மோசடிகள் மிக வேகமாக அதிகரித்து வருகின்றன. மக்களின் பெயர், முகவரி மற்றும் மொபைல் எண்களைத் திருடும் மோசடி கும்பல், அவர்கள் ஆர்டர் செய்யாமலேயே போலி பார்சல்களை அனுப்புகின்றனர். எனவே, உங்களைத் தேடி இது போன்ற பார்சல்கள் வரும்போது, வீட்டில் உள்ளவர்களிடம் உறுதி செய்யாமல் பணம் கொடுக்க வேண்டாம். சந்தேகம் இருந்தால் பார்சலைத் திருப்பி அனுப்பி விடுங்கள். விழிப்புணர்வுடன் இருப்பதே இது போன்ற மோசடிகளில் இருந்து தப்பிக்க ஒரே வழி.