தமிழ் சினிமாவில் 80 களிலும், 90 களிலும் மிகப்பெரிய ஆக்ஷன் ஹீரோவாக வலம் வந்தவர் விஜயகாந்த். அவர் நடித்த ஊமை விழிகள், கேப்டன் பிரபாகரன், புலன் விசாரணை, வானத்தைப் போல, சின்னக்கவுண்டர் மற்றும் ரமணா உள்ளிட்ட படங்கள் எல்லாம் பிளாக்பஸ்டர் ஹிட்களாக அமைந்தன.
எம் ஜி ஆர் போலவே விஜயகாந்தும் திரையில் நடிக்கும் போது சில கொள்கைகளை கடைபிடித்தார். பெரும்பாலும் மது மற்றும் சிகரெட் குடிக்கும் காட்சிகளில் நடிக்க மறுத்துவிடுவார். அதுபோல பெண்கள் மற்றும் வயதானவர்களை அவமரியாதை செய்வது போலவோ அல்லது அடிப்பது போன்ற காட்சிகளிலோ நடிக்க மாட்டார்.
இப்படி ஒரு நெகிழ்ச்சியான சம்பவத்தை பிரபல நடிகர் டெல்லி கணேஷ் பகிர்ந்துள்ளார். விஜயகாந்தின் மரணத்துக்குப் பின்னர் அளித்த ஒரு நேர்காணலில் ”ஒரு படத்தில் விஜயகாந்தின் அப்பாவாக நான் நடித்தேன். ஒரு காட்சியில் அவர் கால் வலிக்கிறது என சொல்வார். நான் அவரின் காலை பிடித்துவிடுவது போல் காட்சி. அதை இயக்குனர் விஜயகாந்துக்கு விளக்கியபோது அந்த காட்சியில் நடிக்க விஜயகாந்த் சம்மதிக்கவில்லை.
இயக்குனரிடம் கோபமாக “அவர் எவ்வளவு பெரிய நடிகர்.. வயதில் மூத்தவர். அவர் போய் என் காலை பிடிப்பதா?.. காட்சியை மாற்றுங்கள் என சொல்லிவிட்டார். இதை இயக்குனர் என்னிடம் வந்து சொன்னபோது நானே விஜயகாந்த் சாரிடம் போய் அவரை சமாதானப்படுத்தினேன். அவரிடம் ‘என்னை டெல்லி கணேஷாக பார்க்க வேண்டும். கதைப்படி மகன் மேல் பாசமாக இருக்கும் அப்பா அதை செய்கிறார். அப்படி மட்டும் பாருங்கள்’ என சொன்னேன். அதன் பிறகுதான் அவர் அந்த காட்சியில் நடிக்க சம்மதித்தார்.
அந்த காட்சியில் நான் அவரின் காலை தொடும்போது என்னை தொட்டு கும்பிட்டு தயங்கியபடியே நடித்தார். அப்படிப்பட்டவர்தான் விஜயகாந்த்.” என டெல்லி கணேஷ் நெகிழ்ந்து போய் கூறியுள்ளார்.