சமூக வலைதளங்களில் தற்போது வைரலாகி வரும் ஸ்விக்கி டெலிவரி ஊழியரின் காணொளி, நவீன கால ‘கிக் எகனாமி’ (Gig Economy) எனப்படும் தற்காலிகப் பணியாளர்களின் வாழ்வியலைத் தோலுரித்துக் காட்டியுள்ளது. வாடிக்கையாளர் ஒருவர் ஆர்டர் செய்த உணவை டெலிவரி செய்ய வந்த ஊழியரை, அந்த வாடிக்கையாளர்கள் தங்களோடு அமர்ந்து உணவருந்த அழைத்த நெகிழ்ச்சியான தருணத்தை அந்தக் காட்சிப் பதிவு காட்டுகிறது. ஆரஞ்சு நிறச் சீருடை அணிந்த அந்த ஊழியர், “லெட்ஸ் பார்ட்டி” (Let’s Party) என எழுதப்பட்டிருந்த அந்த உற்சாகமான சூழலில், வாடிக்கையாளர்களோடு அமர்ந்து உணவருந்தத் தொடங்கும்போது அவரது முகத்தில் தெரிந்த மனநிறைவு காண்போரை நெகிழச் செய்கிறது.
View this post on Instagram
உணவருந்திக் கொண்டிருக்கும் போதே உணர்ச்சிவசப்பட்ட அந்த ஊழியர், தனது அன்றாடப் போராட்டங்களைப் பகிர்ந்து கொள்ளும்போது சூழல் கனமாகிறது. அன்று காலை ஒரு கோப்பைத் தேநீர் மட்டுமே அருந்திவிட்டு வீட்டை விட்டுப் புறப்பட்டதாகவும், நாள் முழுவதும் கடுமையாக உழைத்தும் ஒருவேளை உணவுகூட உட்கொள்ளவில்லை என்றும் அவர் கண்ணீருடன் தெரிவித்தார். தனக்கு ஒரு மகனும் மகளும் இருப்பதாகக் குறிப்பிட்ட அவர், தனது குடும்பத்தின் பசியைப் போக்க ஓயாமல் உழைக்கும் ஒரு தந்தை, தனது சொந்தப் பசியை எப்படிப் புறக்கணிக்கிறார் என்பதை அந்த உரையாடல் உணர்த்தியது.
இந்த நெகிழ்ச்சியான தருணத்தில் அந்த வாடிக்கையாளர்கள் காட்டிய மனிதாபிமானம் பாராட்டுக்குரியதாக அமைந்தது. அழுதுகொண்டே பேசிய அந்த ஊழியரைத் தேற்றிய அவர்கள், முதலில் நிதானமாக உணவை முடிக்குமாறு அன்புடன் கேட்டுக் கொண்டனர். அதோடு நில்லாமல், அவரது வீட்டிற்கு எடுத்துச் செல்வதற்காகக் கூடுதல் உணவையும் அவர்கள் பேக் செய்து வழங்கியதாகத் தெரிகிறது. “தனது குழந்தைகளைப் பராமரிக்கத் துடிக்கும் ஒரு தந்தை, தனது பசியை மறந்து உழைக்கிறார்” என்ற வரிகளுடன் பகிரப்படும் இந்த வீடியோ, உழைக்கும் வர்க்கத்தின் வலிமிகுந்த யதார்த்தத்தைச் சமூகத்தின் முன் வைத்துள்ளது.