மதுரை மீனாட்சி சுந்தரேஸ்வரர் திருக்கோவிலின் குடமுழுக்கு விழா முன்னேற்பாடுகள் குறித்து, அமைச்சர் சி.டி.ஆர். நிர்மல்குமார் காவல்துறை மற்றும் மாவட்ட நிர்வாக அதிகாரிகளுடன் இணைந்து ஆய்வு மேற்கொண்டார். அதனைத் தொடர்ந்து செய்தியாளர்களிடம் பேசிய அவர், விழாவிற்கு வரும் பக்தர்களின் அடிப்படைத் தேவைகள் அனைத்தும் சிறப்பாகச் செய்யப்பட்டு வருவதாகவும், நாளை வீர வசந்தராயர் மண்டபம் திறக்கப்பட உள்ளதாகவும் தெரிவித்தார். கோவில் விவகாரங்களில் எவ்வித அரசியல் தலையீடும் இருக்காது என திட்டவட்டமாகத் தெரிவித்த அமைச்சர், அறங்காவலர் குழுவில் உண்மையான பக்தர்களுக்கு மட்டுமே வாய்ப்பளிக்கப்படும் என்றும், கட்சி சார்ந்தவர்களுக்கோ தனிநபர்களுக்கோ அங்கு இடமில்லை என்றும் உறுதிபடக் கூறினார்.
தேசிய அரசியலில், தமிழக முதல்வர் விஜய் பிரதமருக்கான போட்டியில் மூன்றாவது இடத்தில் இருப்பது தொடர்பான கருத்துக்கணிப்பு குறித்துப் பேசிய அமைச்சர், அதற்கான முடிவை உரிய நேரத்தில் தங்கள் தலைவர் எடுப்பார் என்றார். அதனைத் தொடர்ந்து, அதிமுக முன்னாள் அமைச்சர் ஆர்.பி. உதயகுமாரைக் கடுமையாக விமர்சித்த அவர், ஊடக வெளிச்சத்திற்காகவே உதயகுமார் தமிழக அரசை விமர்சித்து வருவதாகக் குற்றம் சாட்டினார். கடந்த காலத்தில் ஓ.பன்னீர்செல்வத்தைப் புறக்கணித்துவிட்டு சசிகலாவை முதல்வராக்கத் துடித்த அவர், தற்போது எடப்பாடி பழனிசாமியையும் ஓரங்கட்டிவிட்டு அதிமுகவின் பொதுச்செயலாளர் பதவியைக் கைப்பற்றும் ரகசியத் திட்டத்தில் செயல்பட்டு வருவதாகவும், அக்கட்சியின் வீழ்ச்சிக்கு அவரே முழு காரணம் என்றும் சாடினார்.
ஜல்லிக்கட்டுப் போட்டிகள் குறித்து முந்தைய திமுக அரசை விமர்சித்த நிர்மல்குமார், அலங்காநல்லூரில் கட்டப்பட்ட புதிய ஜல்லிக்கட்டு மைதானம் தமிழர்களின் உணர்வுகளைப் புரிந்து கொள்ளாமல், முந்தைய ஆட்சியாளர்களின் சுய விளம்பரத்திற்காக மட்டுமே உருவாக்கப்பட்டது என்றார். பல தலைமுறைகளாக அவனியாபுரம், பாலமேடு மற்றும் அலங்காநல்லூர் ஆகிய பகுதிகளில் உள்ள பாரம்பரியமான வாடிவாசல்களில் தொன்றுதொட்டு நடைபெற்று வரும் ஜல்லிக்கட்டுப் போட்டிகளே வரலாற்றுச் சிறப்பு மிக்கவை என்பதை அவர் சுட்டிக்காட்டினார்.