மும்பை இந்தியன்ஸ் அணிக்கு எதிரான ஐபிஎல் போட்டியில் சென்னை சூப்பர் கிங்ஸ் அணியின் சுழற்பந்து வீச்சாளர் அகீல் ஹொசைன் தனது மாயாஜால பந்துவீச்சால் ஆட்டத்தின் போக்கையே மாற்றியுள்ளார். முதலில் பேட்டிங் செய்த சிஎஸ்கே அணி, சஞ்சு சாம்சனின் அதிரடி சதத்தின் (54 பந்துகளில் 101 ரன்கள்) உதவியுடன் 207 ரன்களைக் குவித்தது. கடினமான இலக்கை நோக்கித் துரத்திய மும்பை அணிக்கு, ஆரம்பத்திலேயே அகீல் ஹொசைன் சிம்ம சொப்பனமாக விளங்கினார். இடதுகை பேட்ஸ்மேன்களுக்கு எதிராக இடதுகை ஸ்பின்னரை களமிறக்கும் கேப்டன் ருதுராஜின் துணிச்சலான முடிவு, சிஎஸ்கே ரசிகர்களிடையே ஆச்சரியத்தை ஏற்படுத்தியது.
ஆட்டத்தின் முதல் ஓவரிலேயே டீ காக் சிக்ஸர் அடித்தாலும், அதே ஓவரின் கடைசி பந்தில் மாலேகரை டக் அவுட்டாக்கி அகீல் பதிலடி கொடுத்தார். தொடர்ந்து 3வது ஓவரை வீசிய அவர், நமர் திர்ரை வீழ்த்தியதுடன் அந்த ஓவரை ‘விக்கெட் மெய்டனாக’ மாற்றி மும்பை அணியை 11 ரன்களுக்கு 3 விக்கெட் என்ற இக்கட்டான நிலைக்குத் தள்ளினார். இதன் மூலம் ஆட்டத்தின் தொடக்கத்திலேயே சிஎஸ்கே முழுமையான கட்டுப்பாட்டைத் தன்வசப்படுத்தியது. அகீல் ஹொசைனின் துல்லியமான பந்துவீச்சு மும்பை வீரர்களுக்கு பெரும் நெருக்கடியை ஏற்படுத்தியது.
மும்பை அணியை மீட்டெடுக்க திலக் வர்மா போராடிய நிலையில், மீண்டும் 11வது ஓவரில் பந்துவீச வந்த அகீல் ஹொசைன், திலக் வர்மாவை 37 ரன்களில் போல்டாக்கி வெளியேற்றினார். அதைத் தொடர்ந்து 14வது ஓவரின் முதல் பந்திலேயே நட்சத்திர வீரர் சூர்யகுமார் யாதவின் விக்கெட்டையும் வீழ்த்தி மும்பை அணியின் நம்பிக்கையைத் தகர்த்தார். ஒட்டுமொத்தமாக 4 ஓவர்களில் ஒரு மெய்டன் உட்பட 17 ரன்களை மட்டுமே விட்டுக்கொடுத்து 4 முக்கிய விக்கெட்டுகளைக் கைப்பற்றி அசத்தினார். இதில் 14 பந்துகள் ‘டாட் பால்’ என்பது குறிப்பிடத்தக்கது.
ஆட்டத்தின் ஒரு கட்டத்தில் சிஎஸ்கே முழு ஆதிக்கம் செலுத்தியபோது, அகீல் ஹொசைன் பந்துவீசும் போது ஷார்ட் லெக் மற்றும் ஸ்லிப் திசையில் ஃபீல்டர்களை நிறுத்தி ருதுராஜ் கெய்க்வாட் வியூகம் அமைத்தார். டி20 போட்டியில் டெஸ்ட் போட்டி போன்ற இந்த ஃபீல்டிங் அமைப்பு மும்பை அணியை நிலைகுலையச் செய்ததுடன், ரசிகர்களிடையே பேசுபொருளாகவும் மாறியது. கடந்த போட்டியில் வாய்ப்பு மறுக்கப்பட்ட நிலையில், தற்போது மிகச்சிறந்த இடதுகை பேட்ஸ்மேன்களை வீழ்த்தி அகீல் ஹொசைன் தனது திறமையை நிரூபித்து அணிக்கு வெற்றியைத் தேடித்தந்துள்ளார்.