எம்.எஸ்.சி வேர்ல்ட் அமெரிக்கா என்ற பிரம்மாண்டமான சொகுசு கப்பலில், 17 வயது சிறுமியுடன் பாலியல் உறவு வைத்துக்கொண்ட குற்றச்சாட்டின் பேரில் 38 வயதான கப்பல் உயிர்காப்பாளர் கைது செய்யப்பட்டுள்ளார். குவாத்தமாலாவைச் சேர்ந்த ரஃபேல் கயேடானோ பிளாங்கோ என்ற இந்த ஊழியர், கப்பல் சனிக்கிழமையன்று அமெரிக்காவின் மியாமி துறைமுகத்திற்குத் திரும்பியபோது காவல்துறையினரால் கைது செய்யப்பட்டு தற்போது சிறையில் அடைக்கப்பட்டுள்ளார்.
சுமார் 6,700-க்கும் மேற்பட்ட பயணிகளையும் 2,100 பணியாளர்களையும் ஏற்றிச் செல்லக்கூடிய இந்த கப்பல், கடந்த ஆகஸ்ட் 15 அன்று மியாமியிலிருந்து புறப்பட்டு ஹோண்டுராஸ், மெக்சிகோ மற்றும் பஹாமாஸ் ஆகிய இடங்களுக்குப் பயணம் மேற்கொண்டது. பயணத்தின் முதல் நாளான ஆகஸ்ட் 16 அன்று, கப்பலில் பயணித்த 17 வயது பெண் பயணியுடன் ரஃபேல் தொலைபேசி எண்களைப் பரிமாறிக்கொண்டுள்ளார். அன்றைய தினமே நள்ளிரவில் அந்த சிறுமி தனது அறைக்கு வந்ததாகவும், அவருடன் உடலுறவு கொண்டதாகவும் புலனாய்வாளர்களிடம் ரஃபேல் ஒப்புக்கொண்டுள்ளார்.
இதனைத் தொடர்ந்து, மூன்று நாட்களுக்குப் பிறகு அந்த சிறுமி மீண்டும் ரஃபேலின் அறைக்குச் சென்றதாகவும், இருவரும் இரண்டாவது முறையாக பாலியல் உறவில் ஈடுபட்டதாகவும் காவல்துறை விசாரணையில் உறுதி செய்யப்பட்டுள்ளது. 18 வயதிற்கு உட்பட்ட சிறுமியுடன் சட்டவிரோதமான முறையில் பாலியல் நடவடிக்கையில் ஈடுபட்டதை ரஃபேல் ஒப்புக்கொண்டதையடுத்து, அவர் மீது கடுமையான சட்டப் பிரிவுகளின் கீழ் வழக்குப்பதிவு செய்யப்பட்டுள்ளது.
இந்தச் சம்பவம் குறித்துத் தகவலறிந்த உடனடியாகச் செயல்பட்டதாகக் கப்பல் நிர்வாகத்தின் உயரதிகாரிகள் தெரிவித்துள்ளனர். பணியாளரின் இந்த விதிகளுக்குப் புறம்பான நடத்தை மற்றும் குற்றச் செயல் வெளிச்சத்திற்கு வந்தவுடனேயே, சட்ட அமலாக்க அதிகாரிகளுக்குத் தகவல் தெரிவிக்கப்பட்டு, கப்பல் துறைமுகம் வந்தடைந்ததும் அவர் அதிகாரிகளிடம் ஒப்படைக்கப்பட்டதாக நிர்வாகத் தரப்பில் தெரிவிக்கப்பட்டுள்ளது.