மத்திய அரசின் இந்த முன்னெச்சரிக்கை நடவடிக்கை பொதுமக்களிடையே தேவையில்லாத அச்சத்தையும், எல்.பி.ஜி (LPG) சிலிண்டர்களுக்கான தட்டுப்பாடு மீண்டும் ஏற்படுமோ என்ற வதந்தியையும் கிளப்பியுள்ளது. சர்வதேச அளவில் ஹார்முஸ் நீரிணை மூடப்பட்டுள்ளதால் ஏற்பட்டுள்ள அசாதாரண சூழலைக் கருத்தில் கொண்டு, முன்னெச்சரிக்கை நடவடிக்கையாக 30 நாள்களுக்குத் தேவையான சமையல் எரிவாயுவைச் சேமித்து வைக்குமாறு எண்ணெய் நிறுவனங்களுக்குப் பெட்ரோலிய அமைச்சகம் அறிவுறுத்தியுள்ளது.
அதே வேளையில், தற்போதைக்கு நாட்டில் பெட்ரோல், டீசல் மற்றும் எல்.பி.ஜி இருப்பு போதுமான அளவு உள்ளதாகவும், பொதுமக்கள் அச்சப்படத் தேவையில்லை என்றும் அரசு தெளிவுபடுத்தியுள்ளது. இருப்பினும், கடந்த கால அனுபவங்களை மனதில் கொண்டு, அரசின் இந்த எச்சரிக்கையாலேயே சந்தையில் செயற்கையான தட்டுப்பாடு மற்றும் பீதி கொள்முதல் (panic buying) உருவாகிவிடுமோ என்ற கவலை நுகர்வோர் மத்தியில் எழுந்துள்ளதை மறுப்பதற்கில்லை.