புதுக்கோட்டையில் நடைபெற்ற அதிமுகவின் கண்டன ஆர்ப்பாட்டத்தில் பேசிய முன்னாள் அமைச்சர் சி.விஜயபாஸ்கர், வாக்காளர்களைக் கவரும் வகையில் சர்ச்சைக்குரிய கருத்துக்களைத் தெரிவித்தது தற்போது அரசியல் வட்டாரத்தில் பெரும் பரபரப்பை ஏற்படுத்தியுள்ளது. “யார் காசு கொடுத்தாலும் வாங்கிக் கொள்ளுங்கள், ஆனால் உங்கள் ஓட்டு மட்டும் இரட்டை இலைக்குத்தான் விழ வேண்டும்” என்று வெளிப்படையாகப் பேசிய அவர், தேர்தல் காலங்களில் நிலவும் பணப் பரிமாற்றத்தை மறைமுகமாக விமர்சிக்கும் அதே வேளையில், கட்சி விசுவாசத்தை வலியுறுத்தினார்.
அவரது பேச்சின் மற்றொரு பகுதி சமூக வலைதளங்களில் விவாதப் பொருளாகியுள்ளது. “உங்கள் வீட்டின் அருகிலுள்ள பாட்டிகளிடம் பேசி அவர்களை ‘கரெக்ட்’ செய்துவிடுங்கள்; இல்லையென்றால் தலையணையை வைத்து முடித்துவிடுங்கள்” என்று அவர் கூறியது அதிர்ச்சியை ஏற்படுத்தியது. இருப்பினும், உடனடியாகச் சுதாரித்துக் கொண்ட அவர், தாம் கூறியது “வாக்கு கணக்கை முடிப்பதை” (முடிவு செய்வதை) மட்டுமே குறிப்பதாகத் தன்னிலை விளக்கம் அளித்தார். நகைச்சுவையாகப் பேசுவதாக நினைத்து அவர் கையாண்ட இந்த வார்த்தைப் பிரயோகம், தற்போது பல்வேறு தரப்பினரின் விமர்சனங்களுக்கு உள்ளாகி வருகிறது.