தாய்லாந்து நாட்டின் தலைநகர் பாங்காக்கிலிருந்து வடகிழக்கு மாகாணமான உபோன் ரட்சதானி நோக்கிச் சென்று கொண்டிருந்த பயணிகள் ரயிலின் மீது, கட்டுமானப் பணிக்காக வைக்கப்பட்டிருந்த கிரேன் ஒன்று எதிர்பாராதவிதமாகச் சரிந்து விழுந்து பெரும் விபத்து ஏற்பட்டுள்ளது. நக்கோன் ராட்சசிமா மாகாணத்தின் சீகியோ மாவட்டத்தில் நிகழ்ந்த இந்த கோர விபத்தில், ரயிலின் ஒரு பெட்டி நசுங்கியதுடன் தண்டவாளத்தை விட்டுத் தடம் புரண்டு தீப்பிடித்தது. இந்தச் சம்பவத்தில் 22 பயணிகள் சம்பவ இடத்திலேயே உயிரிழந்ததுடன், 30-க்கும் மேற்பட்டோர் படுகாயமடைந்துள்ளனர் என்ற அதிர்ச்சித் தகவல் வெளியாகியுள்ளது.
சுமார் 195 பயணிகளுடன் சென்ற இந்த ரயிலில் விபத்து ஏற்பட்டவுடன், மீட்புப் படையினர், தீயணைப்புத் துறையினர் மற்றும் காவல்துறையினர் விரைந்து வந்து மீட்புப் பணிகளை முடுக்கிவிட்டனர். விபத்தில் சிக்கியவர்களை மீட்கும் பணிகள் தீவிரமாக நடைபெற்று வரும் நிலையில், பலரது நிலைமை கவலைக்கிடமாக இருப்பதால் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது. தற்பொழுது காயமடைந்தவர்கள் அருகில் உள்ள மருத்துவமனைகளில் அனுமதிக்கப்பட்டு அவர்களுக்குத் தீவிர சிகிச்சை அளிக்கப்பட்டு வருகிறது.
தண்டவாளப் பராமரிப்புப் பணிகளுக்காக அங்கு நிறுத்தப்பட்டிருந்த கிரேன், ரயில் கடந்து சென்றபோது திடீரென சரிந்ததே இந்த விபத்துக்குக் காரணம் என முதற்கட்ட விசாரணையில் தெரியவந்துள்ளது. தாய்லாந்து போக்குவரத்துத் துறை இந்தச் சம்பவம் குறித்து விரிவான விசாரணைக்கு உத்தரவிட்டுள்ளது. உயிரிழந்தவர்களின் உடல்களை அடையாளம் காணும் பணி தற்போது நடைபெற்று வரும் நிலையில், சமூக வலைதளங்களில் பகிரப்படும் விபத்துக் காட்சிகள் பொதுமக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.