இதெல்லாம் சரிப்பட்டு வராது… ராகுல் காந்தி போட்ட “நோ”… கதிகலங்கிப்போன சத்தியமூர்த்தி பவன்… கடைசியில் நடந்த டுவிஸ்ட்…!

தமிழக சட்டமன்றத் தேர்தலுக்கான வேட்பாளர் தேர்வில் காங்கிரஸ் கட்சிக்குள் நிலவும் கடும் இழுபறி, அக்கட்சியின் தலைமை அலுவலகமான சத்தியமூர்த்தி பவனில் பெரும் பரபரப்பை ஏற்படுத்தியுள்ளது. திமுக கூட்டணியில் 28 தொகுதிகளைப் பெற்றுள்ள காங்கிரஸ், வேட்புமனுத் தாக்கல் தொடங்கிய பின்னரும் பட்டியலை வெளியிட முடியாமல் திணறி வருகிறது. மாநிலத் தலைவர் செல்வப்பெருந்தகை தயாரித்து வழங்கிய பட்டியலை ராகுல் காந்தி அதிரடியாக நிராகரித்ததே இந்த தாமதத்திற்கு முக்கியக் காரணமாகக் கூறப்படுகிறது. தொகுதிகள் மற்றும் வேட்பாளர் தேர்வில் முறைகேடுகள் நடப்பதாக எழுந்த புகார்களைத் தொடர்ந்து, புதிய பட்டியலைத் தயாரிக்குமாறு ராகுல் காந்தி உத்தரவிட்டிருப்பது கட்சிக்குள் சலசலப்பை உண்டாக்கியுள்ளது.

குறிப்பாக, பாமக கௌரவத் தலைவர் ஜி.கே.மணியின் மகன் தமிழ்க்குமரனை கட்சியில் இணைத்து, அவருக்கு பென்னாகரம் தொகுதியில் போட்டியிட வாய்ப்பளிக்க செல்வப்பெருந்தகை எடுத்த முடிவுக்கு கடும் எதிர்ப்பு கிளம்பியுள்ளது. இது தொடர்பாக நடைபெற்ற ஆலோசனைக் கூட்டத்தில், “தமிழ்க் குமரனுக்கும் காங்கிரசுக்கும் என்ன சம்பந்தம்? அவருக்கு சீட் கொடுக்கத்தான் இந்தத் தொகுதி வாங்கப்பட்டதா?” என எம்.பி. கார்த்தி சிதம்பரம் உள்ளிட்ட மூத்த நிர்வாகிகள் செல்வப்பெருந்தகையை நேருக்கு நேராக விமர்சித்துள்ளனர். ஏற்கனவே எம்.பி. ஜோதிமணி போன்றவர்கள் வேட்பாளர் தேர்வு குறித்து வெளிப்படையான புகார்களை முன்வைத்த நிலையில், இந்த கோஷ்டி மோதல்கள் டெல்லி வரை எதிரொலித்துள்ளன.

கே.சி. வேணுகோபால் மற்றும் கிரிஸ் சோடங்கர் ஆகியோருடன் ராகுல் காந்தி நடத்திய தீவிர ஆலோசனையில், சிட்டிங் எம்.எல்.ஏ.க்களின் வாய்ப்பு மற்றும் தொகுதி விற்பனை புகார்கள் குறித்து விரிவாக விவாதிக்கப்பட்டது. செல்வப்பெருந்தகைக்கு எதிராகத் திரட்டப்பட்ட ஆதாரங்களின் அடிப்படையில், வேட்பாளர் பட்டியலில் ஏற்கனவே இரண்டு முறை திருத்தங்கள் செய்யப்பட்டுள்ளன. இன்று மாலைக்குள் இறுதிப் பட்டியல் வெளியாகலாம் என்ற எதிர்பார்ப்பு நிலவினாலும், வேட்பாளர் தேர்வில் நிலவும் குளறுபடிகள் கட்சித் தொண்டர்களிடையே அதிருப்தியை ஏற்படுத்தியுள்ளது.

டெல்லியில் அரங்கேறி வரும் இந்த அரசியல் நகர்வுகளைக் கவனிக்கும் காங்கிரஸ் வட்டாரங்கள், இந்தப் பட்டியல் விவகாரம் மாநிலத் தலைமையின் செல்வாக்கை வெகுவாகப் பாதித்துள்ளதாகத் தெரிவிக்கின்றன. தேர்தல் முடிவுகளுக்குப் பிறகு மாநிலத் தலைவர் பதவியிலிருந்து செல்வப்பெருந்தகை மாற்றப்படலாம் என்கிற பேச்சும் சத்தியமூர்த்தி பவனில் பலமாக ஒலிக்கத் தொடங்கியுள்ளது. ராகுல் காந்தியின் இந்த அதிரடித் தலையீடு, கட்சியில் நிலவும் கோஷ்டிப் பூசலுக்கு முற்றுப்புள்ளி வைக்குமா அல்லது புதிய சர்ச்சைகளை உருவாக்குமா என்பது பட்டியல் வெளியான பின்னரே தெரியவரும்.