“ஆறு கேட்ட பாஜக.. ஒன்றை மட்டும் கொடுத்த அதிமுக”…. கூட்டணியில் கைகூடாத ‘அறுபடை வீடு’ பாலிடிக்ஸ்… அமித்ஷாவுக்கு இபிஎஸ் கொடுத்த ஷாக்…!

தமிழகத்தில் ஆன்மீக அரசியலை வலுப்படுத்தும் நோக்கில், 2026 சட்டமன்றத் தேர்தலில் முருகப்பெருமானின் அறுபடை வீடுகள் அமைந்துள்ள தொகுதிகளைக் குறிவைத்து பாஜக ஒரு பலமான திட்டத்தைத் தீட்டியிருந்தது. திருப்பரங்குன்றம், திருச்செந்தூர், பழனி, சுவாமிமலை (பாபநாசம்), திருத்தணி மற்றும் பழமுதிர்சோலை (மேலூர்) ஆகிய ஆறு இடங்களையும் அல்லது குறைந்தபட்சம் மூன்று தொகுதிகளையாவது பெற்று, முருக பக்தர்களின் உணர்வுகளை வாக்குகளாக மாற்ற அக்கட்சி விரும்பியது. குறிப்பாக, திருப்பரங்குன்றம் தீபத்தூண் விவகாரம் மற்றும் எல்லையோரத் தொகுதிகளில் நிலவும் சமூகக் கட்டமைப்பைத் தங்களுக்குச் சாதகமாகப் பயன்படுத்த பாஜக திட்டமிட்டிருந்தது.

இருப்பினும், அதிமுக பொதுச்செயலாளர் எடப்பாடி பழனிச்சாமி இந்த விவகாரத்தில் மிகவும் சாதுரியமாகச் செயல்பட்டு பாஜகவின் கணக்குகளை மாற்றியமைத்துள்ளார். கூட்டணியில் பாஜக கேட்ட தொகுதிகளில் பெரும்பாலானவற்றை அதிமுகவே வைத்துக்கொண்டது. குறிப்பாக, பாஜக பெரிதும் எதிர்பார்த்த திருப்பரங்குன்றம் தொகுதியை, மதுரை மாவட்டச் செயலாளர் ராஜன் செல்லப்பாவின் பிடிவாதத்தால் அதிமுகவே தக்கவைத்துக்கொண்டது. அதேபோல் பழனி, பாபநாசம், மேலூர் ஆகிய தொகுதிகளிலும் அதிமுக தனது வேட்பாளர்களை அறிவித்து களம் இறக்கியுள்ளது.

இந்தத் தொகுதிப் பங்கீட்டில் பாஜகவிற்கு இரண்டாம் படை வீடான திருச்செந்தூர் தொகுதி மட்டுமே ஒதுக்கப்பட்டுள்ளது. அங்குள்ள நாடார் மற்றும் மீனவர் சமூக வாக்குகளைக் கருத்தில் கொண்டு இந்த ஒரு இடத்தை மட்டும் எடப்பாடி பழனிச்சாமி விட்டுக் கொடுத்துள்ளார். மற்ற ஐந்து படை வீடுகளிலும் அதிமுகவே நேரடியாகக் களமிறங்குவதால், மாநிலம் முழுவதும் முருக பக்தியை மையமாக வைத்து பாஜக முன்னெடுக்க நினைத்த “அறுபடை வீடு பாலிடிக்ஸ்” பெரிய அளவில் கைகூடாமல் போயுள்ளது. இது பாஜகவினரிடையே சற்று ஏமாற்றத்தை ஏற்படுத்தினாலும், அதிமுக தனது செல்வாக்குள்ள இடங்களை விட்டுக் கொடுக்காமல் கெட்டியாகப் பிடித்துக் கொண்டுள்ளது.

தற்போது தேர்தல் களம் சூடுபிடித்துள்ள நிலையில், திமுகவின் கவர்ச்சிகரமான தேர்தல் அறிக்கைகள் மற்றும் தவெக போன்ற புதிய கட்சிகளின் வரவால் போட்டி மும்முனை, நான்முனை எனத் தீவிரமடைந்துள்ளது. இந்தச் சூழலில், ஆன்மீக அடையாளத்தை மட்டும் நம்பாமல், அந்தந்த தொகுதிகளில் உள்ள சமூக வாக்குகளையும், உள்ளூர் பிரச்சினைகளையும் மையமாக வைத்தே அதிமுக தனது வேட்பாளர்களை நிறுத்தியுள்ளது. எடப்பாடி பழனிச்சாமியின் இந்த அரசியல் நகர்வு, கூட்டணியில் மேலாதிக்கத்தைச் செலுத்துவதோடு, பாஜகவின் ஆன்மீக அரசியல் வியூகத்தைத் தற்காலிகமாக முடக்கியுள்ளதாக அரசியல் விமர்சகர்கள் கருதுகின்றனர்.