தமிழக முதலமைச்சரும் தமிழக வெற்றிக் கழகத்தின் (தவெக) தலைவருமான ச. ஜோசப் விஜய், அண்மையில் திருச்சியில் நடைபெற்ற நன்றி அறிவிப்புக் கூட்டத்தில் நிதி மற்றும் சட்டம் ஒழுங்கு நிலை குறித்துப் பேசினார். இதற்குப் பதிலடி கொடுக்கும் வகையில் செய்தியாளர்களைச் சந்தித்த திமுக எம்.பி. ஆ. ராசா, “திட்டங்களுக்கு நிதி இல்லை என்றால் பரவாயில்லை, ஆனால் சட்டம் ஒழுங்குப் பிரச்சினைக்கும் நிதிக்கும் என்ன தொடர்பு? காவல்துறை உங்கள் வசம் இருக்கும்போது, சட்டம் ஒழுங்கை நிலைநாட்ட ஏன் கால அவகாசம் கேட்கிறீர்கள்?” என முதலமைச்சர் விஜய்க்கு அடுக்கடுக்கான கேள்விகளை எழுப்பினார்.
ஆ. ராசாவின் இந்தக் கடுமையான விமர்சனத்திற்கு, தவெக கூட்டணியில் இடம்பெற்றுள்ள காங்கிரஸ் கட்சியின் எம்.பி. மாணிக்கம் தாகூர் தற்போது பதில் கேள்வி எழுப்பியுள்ளார். செய்தியாளர்களிடம் பேசிய அவர், கடந்த ஐந்து ஆண்டுகளில் அண்ணா பல்கலைக்கழக விவகாரம் அல்லது கோவை சம்பவம் என எதற்கும் கேள்வி கேட்காமல் மௌனம் காத்த ஆ. ராசா, இப்போது மட்டும் திடீரென வீரம் பேசுவது ஏன் என்று சாடினார்.
மேலும், கடந்த கால ஆட்சியாளர்களின் செயல்பாடுகளால்தான் காவல்துறையின் கட்டமைப்பு தளர்வடைந்துள்ளது எனக் குறிப்பிட்ட மாணிக்கம் தாகூர், “நீங்கள் காவல்துறையை இயக்கிய விதத்தால்தான் அதன் இன்ஜின் பழுதடைந்து நிற்கிறது; அதனைச் சரிசெய்ய தற்போதைய முதலமைச்சர் விஜய்க்குப் போதிய கால அவகாசம் வழங்கப்பட வேண்டும்” என்று கூறி தவெக அரசுக்குத் தனது ஆதரவைத் தெரிவித்தார்.