தமிழக அரசியலில் பெரும் எதிர்பார்ப்புகளுக்கு மத்தியில், திமுக மற்றும் காங்கிரஸ் இடையிலான தேர்தல் கூட்டணி இன்று உறுதியாகியுள்ளதாக காங்கிரஸ் கட்சியின் மூத்த தலைவர் கோபண்ணா அதிகாரப்பூர்வமாக அறிவித்துள்ளார். தொகுதிப் பங்கீடு தொடர்பாக நிலவி வந்த இழுபறிகளுக்கு முற்றுப்புள்ளி வைக்கும் விதமாக, இன்று காலை சுபச்செய்தி கிடைத்துள்ளதாகவும், இரு கட்சிகளுக்கும் இடையிலான உறவு வலுவாக இருப்பதாகவும் அவர் மகிழ்ச்சியுடன் தெரிவித்துள்ளார்.
கடந்த சில நாட்களாக காங்கிரஸ் கட்சி, தமிழக வெற்றிக் கழகத்துடன் கூட்டணி அமைக்கப் போவதாகப் பரவிய வதந்திகளுக்கும் கோபண்ணா இதன்போது விளக்கம் அளித்துள்ளார். காங்கிரஸ் மற்றும் தவெக இடையே கூட்டணி அமைப்பதற்கான முயற்சிகள் கடந்த 6 மாதங்களாக மேற்கொள்ளப்பட்ட போதிலும், அந்த முயற்சிகள் தற்போது முறியடிக்கப்பட்டுவிட்டதாக அவர் குறிப்பிட்டுள்ளார். இதன் மூலம் திமுக – காங்கிரஸ் கூட்டணி உடையாது என்பது மீண்டும் ஒருமுறை தெளிவுபடுத்தப்பட்டுள்ளது.
தேர்தல் வியூகங்கள் மற்றும் தொகுதிப் பங்கீடு குறித்த பேச்சுவார்த்தைகள் இறுதி நிலையை எட்டியுள்ள நிலையில், இரு தரப்புத் தலைவர்களும் இன்று சந்தித்துப் பேசி ஒப்பந்தத்தை உறுதி செய்வார்கள் என எதிர்பார்க்கப்படுகிறது. காங்கிரஸுக்கு எத்தனை தொகுதிகள் ஒதுக்கப்படும் என்பது குறித்த அதிகாரப்பூர்வ அறிவிப்பு விரைவில் வெளியாகும் என்றும், மதச்சார்பற்ற கொள்கைகளின் அடிப்படையில் இந்தக் கூட்டணி தொடர்ந்து செயல்படும் என்றும் அவர் உறுதிபடக் கூறியுள்ளார்.
இந்த அறிவிப்பு திமுக மற்றும் காங்கிரஸ் கட்சித் தொண்டர்களிடையே உற்சாகத்தை ஏற்படுத்தியுள்ளது. கடந்த சட்டமன்ற மற்றும் நாடாளுமன்றத் தேர்தல்களில் வெற்றி பெற்றதைப் போலவே, எதிர்வரும் தேர்தலிலும் இந்தக் கூட்டணி மாபெரும் வெற்றியைப் பெறும் என்று நம்பிக்கை தெரிவித்துள்ள கோபண்ணா, தமிழகத்தின் அரசியல் களம் தற்போது தெளிவான பாதையில் செல்வதாகவும் சுட்டிக்காட்டியுள்ளார்.