தமிழக அரசியலில் ‘பவர் பாம்’… ராகுல் கையில் இருக்கும் அந்த ரகசிய லிஸ்ட்… விஜய்க்குச் சாதகமாக மாறம் 2026 தேர்தல் களம்….!

தமிழக அரசியலில் 2026 சட்டமன்றத் தேர்தலை முன்னிட்டு கூட்டணிக் கணக்குகள் தற்போதே சூடுபிடிக்கத் தொடங்கியுள்ளன. குறிப்பாக, தமிழக முதல்வர் மு.க. ஸ்டாலின் அண்மையில் அளித்த பேட்டி ஒன்றில், தமிழகத்தில் கூட்டணி ஆட்சி என்ற நடைமுறைக்கு இடமில்லை என்றும், ஆட்சி அதிகாரத்தில் யாருக்கும் பங்கு அளிக்கப்படாது என்றும் திட்டவட்டமாகத் தெரிவித்தார். முதலமைச்சரின் இந்த அதிரடி அறிவிப்பு, நீண்டகாலமாக திமுக கூட்டணியில் இருந்து வரும் காங்கிரஸ் கட்சிக்கு பெரும் அதிர்ச்சியையும், சங்கடத்தையும் ஏற்படுத்தியுள்ளது.

திமுகவின் இந்த ஒற்றையாட்சி நிலைப்பாட்டால் அதிருப்தியடைந்துள்ள காங்கிரஸ் தலைமை, தற்போது மாற்று வழிகள் குறித்து தீவிரமாக ஆலோசித்து வருகிறது. திமுகவுடன் இணக்கமான உறவைப் பேணி வந்த ராகுல் காந்தி, ஸ்டாலினின் இந்த பகிரங்கப் பேச்சால் அதிருப்தியில் இருப்பதாகக் கூறப்படுகிறது. இதனைத் தொடர்ந்து, தமிழகத்தைச் சேர்ந்த காங்கிரஸ் முக்கிய நிர்வாகிகளான பிரவீன் சக்கரவர்த்தி மற்றும் மாணிக்கம் தாகூர் ஆகியோர் ராகுல் காந்தியைச் சந்தித்து, தமிழகத்தின் தற்போதைய அரசியல் சூழல் மற்றும் தொகுதி நிலவரங்கள் குறித்து விரிவான அறிக்கையைச் சமர்ப்பித்துள்ளனர்.

இந்தச் சூழலில், திமுக கூட்டணியில் இருந்து விலகி நடிகர் விஜய்யின் ‘தமிழக வெற்றி கழகம்’ கட்சியுடன் கூட்டணி அமைப்பதற்கான சாத்தியக்கூறுகளை காங்கிரஸ் ஆராய்ந்து வருவதாகத் தகவல்கள் வெளியாகியுள்ளன. தவெக-வுடன் இணைந்தால் எந்தெந்தத் தொகுதிகளில் வெற்றி வாய்ப்பு உள்ளது என்பது குறித்த புள்ளிவிவரங்கள் மேலிடத்திற்கு வழங்கப்பட்டுள்ளன. விஜய்யின் அரசியல் வருகை இளைஞர்களிடையே ஏற்படுத்தியுள்ள தாக்கத்தை அறுவடை செய்ய காங்கிரஸ் விரும்புவதாக அரசியல் விமர்சகர்கள் கருதுகின்றனர்.

அடுத்தகட்ட நடவடிக்கையாக, காங்கிரஸ் பொதுச் செயலாளர் கே.சி. வேணுகோபால் விரைவில் சென்னை வரக்கூடும் என்றும், அப்போது விஜய் தரப்புடன் முதற்கட்ட பேச்சுவார்த்தைகள் நடத்தப்படலாம் என்றும் எதிர்பார்க்கப்படுகிறது. இந்தத் திடீர் திருப்பம் தமிழகத்தின் தற்போதைய கூட்டணி கட்டமைப்பில் பெரும் மாற்றத்தை ஏற்படுத்தக்கூடும். 2026 தேர்தலில் ஒரு புதிய வலுவான கூட்டணி அமையுமா அல்லது திமுக தனது நிலைப்பாட்டை மாற்றிக்கொள்ளுமா என்பது வரும் வாரங்களில் தெரியவரும்.