திமுக, அதிமுக ஆட்சியில் இல்லாத புதிய கட்டுப்பாடு…. தவெக அரசின் ‘புகார் பெட்டி’ ரகசியம் என்ன?… பரபரக்கும் தலைமைச் செயலகம்…!

தமிழக அரசியல் வரலாற்றில் ஒரு புதிய திருப்பமாக, திமுக மற்றும் அதிமுக ஆகிய இரு பெரும் கட்சிகளையும் வீழ்த்தி தமிழக வெற்றிக் கழகம் (தவெக) ஆட்சிக்கட்டிலில் அமர்ந்துள்ளது. முதலமைச்சராகப் பொறுப்பேற்றுள்ள விஜய்யின் செயல்பாடுகள் மக்கள் மத்தியில் ஆதரவையும், அதே வேளையில் சில விமர்சனங்களையும் ஒருசேரப் பெற்று வருகின்றன. தவெக அரசின் சில திட்டங்கள் பரவலான வரவேற்பைப் பெற்றாலும், நிர்வாக ரீதியாக எடுக்கப்படும் சில முடிவுகள் தற்பொழுது பெரும் விவாதப் பொருளாக மாறியுள்ளன.

அந்த வகையில், சென்னை தலைமைச் செயலகத்தில் உள்ள முதலமைச்சரின் தனிப்பிரிவுக்கு மனு அளிக்க வரும் பொதுமக்களின் எண்ணிக்கை நாளுக்கு நாள் அசுர வேகத்தில் அதிகரித்து வருகிறது. புதிய அரசிடம் தங்களின் குறைகளைத் தீர்த்துக்கொள்ள மக்கள் காட்டும் ஆர்வம் காரணமாக தலைமைச் செயலக வளாகத்தில் தினமும் கடுமையான கூட்ட நெரிசல் ஏற்பட்டு வருகிறது. இந்தத் திடீர் கூட்டத்தைக் கையாள்வதில் பாதுகாப்பு மற்றும் நிர்வாக ரீதியாகப் பல்வேறு நடைமுறைச் சிக்கல்களை அரசு அதிகாரிகள் எதிர்கொண்டு வருகின்றனர்.

இதற்குத் தீர்வாக, தலைமைச் செயலகத்திற்குள் ஏற்படும் கூட்ட நெரிசலைக் குறைக்கும் பொருட்டு, அதன் வெளிப்புறத்திலேயே பொதுமக்களின் மனுக்களைப் பெற்றுக்கொள்ள ஒரு புதிய ‘புகார் பெட்டி’ வைக்கப்பட்டுள்ளது. மேலும், பாதுகாப்பு காரணங்களை முன்னிட்டு, இனிவரும் காலங்களில் உரிய அனுமதிச் சீட்டு (Pass) வைத்திருப்பவர்கள் மட்டுமே தலைமைச் செயலக வளாகத்திற்குள் அனுமதிக்கப்படுவார்கள் என்று காவல்துறையினரும், அரசு அதிகாரிகளும் அதிரடியாக அறிவித்துள்ளனர். கடந்த திமுக, அதிமுக ஆட்சிக்காலங்களில் மக்கள் நேரடியாகச் சென்று மனுக்களை வழங்கி வந்த நிலையில், தற்போது இந்த புதிய கட்டுப்பாடு விதிக்கப்பட்டுள்ளது.

இதுகுறித்து அரசு அதிகாரிகள் தரப்பில் கூறும்போது, “முதலமைச்சரின் தனிப்பிரிவுக்கு நேரடியாக வந்து புகாரளிக்கும் மக்களின் எண்ணிக்கை அதிகரித்துள்ளதால், நிர்வாக ஒழுங்கிற்காக இந்த நடவடிக்கை எடுக்கப்பட்டுள்ளது. பொதுமக்கள் தனிப்பிரிவு வரை வராமல், வெளிப்புறத்தில் உள்ள புகார் பெட்டியிலேயே தங்கள் மனுக்களைச் சமர்ப்பிக்கலாம்; இதன் மூலம் கூட்ட நெரிசல் கணிசமாகக் குறையும்” என்று விளக்கம் அளித்துள்ளனர். எனினும், புதிய தவெக அரசின் இந்த நடவடிக்கை, மக்களுக்கும் முதலமைச்சருக்குமான நேரடித் தொடர்பைத் துண்டிக்கும் விதமாக அமைந்துவிடுமோ என்ற அச்சத்தையும், விவாதத்தையும் அரசியல் வட்டாரத்தில் கிளப்பியுள்ளது.