த.வெ.க ஆட்சிக்கு கம்யூனிஸ்ட் ஆதரவு தொடரும்…! – பெ. சண்முகம் அதிரடி பேட்டி… தமிழக அரசியலில் பரபரப்பு…!!

மதுரையில் செய்தியாளர்களைச் சந்தித்த மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம், தமிழக அரசியல் சூழல் குறித்துப் பல்வேறு முக்கியக் கருத்துகளைப் பகிர்ந்துகொண்டார். குறிப்பாக, தமிழக வெற்றிக் கழகத்தின் ஆட்சிக்கு வெளியிலிருந்து கம்யூனிஸ்ட் கட்சி அளிக்கும் ஆதரவு தொடர்ந்து நீடிக்கும் என்று அவர் உறுதிபடத் தெரிவித்தார். இதில் எந்தவிதமான மாற்றமும் கிடையாது என்றும் அவர் தங்களின் அரசியல் நிலைப்பாட்டைத் தெளிவுபடுத்தினார்.

வரவிருக்கும் இடைத்தேர்தல் குறித்துப் பேசிய அவர், மார்க்சிஸ்ட் கம்யூனிஸ்ட் கட்சி இதுவரை எந்த முடிவும் எடுக்கவில்லை என்று கூறினார். தாங்கள் பிற அணிகளில் இல்லை என்றும், ‘இடதுசாரி அணி’ என்ற அடிப்படையில் தனித்தே செயல்படுவதாகவும் குறிப்பிட்டார். மேலும், ஆளுநரின் ஆய்வுக்கூட்டம் குறித்துப் பேசுகையில், முன்னாள் ஆளுநர் ஆர்.என். ரவியின் இத்தகைய அணுகுமுறைகளைத் தமிழகம் ஒட்டுமொத்தமாகக் கண்டித்திருப்பதை நினைவு கூர்ந்த அவர், தற்போதைய ஆளுநரும் அதே அணுகுமுறையைத் தொடர்வது பொருத்தமானது அல்ல என்று விமர்சித்தார்.

தொடர்ந்து கரூர் விவகாரம் தொடர்பாகத் தனது கருத்துகளைப் பதிவு செய்த பெ. சண்முகம், இந்த விவகாரத்தில் மத்திய புலனாய்வுத் துறையின் விசாரணை தற்போது போய்க்கொண்டிருக்கிறது என்று சுட்டிக்காட்டினார். இவ்வாறு விசாரணை ஒருபுறம் தீவிரமாக நடந்துகொண்டிருக்கும் போதே, அது குறித்து அமைச்சர் ஆதவ் அர்ஜுனா பல்வேறு கருத்துக்களைத் தெரிவிப்பது ஏற்புடையதல்ல என்றும் அவர் தனது பேட்டியில் அழுத்தமாகக் குறிப்பிட்டார்.