விஜய் அமைச்சரவையின் ‘நம்பர் 2’ இவர்தான்…. ஒட்டுமொத்த அரசியல் வட்டாரங்களையும் திரும்பிப் பார்க்க வைத்த துறை ஒதுக்கீடு… மாஸ் காட்டும் செங்கோட்டையன்..!

தமிழகத்தில் தமிழக வெற்றிக் கழகம் (தவெக) தலைவர் விஜய் தலைமையில் புதிய அமைச்சரவை பொறுப்பேற்றுள்ள நிலையில், அமைச்சர்களுக்கான துறை ஒதுக்கீடு குறித்த அதிகாரப்பூர்வ அறிவிப்பை சென்னை லோக் பவன் வெளியிட்டுள்ளது. பொதுமக்கள் மற்றும் அரசியல் வட்டாரங்களில் பெரும் எதிர்பார்ப்பை ஏற்படுத்தியிருந்த இந்த அறிவிப்பு, புதிய அரசின் செயல்பாடுகளுக்கு ஒரு தெளிவான திசையைக் காட்டியுள்ளது. இதில் மிக முக்கியத்துவமும், கவனமும் பெற்ற முடிவாக ஒட்டுமொத்த மாநிலத்தின் பொருளாதாரத்தை வழிநடத்தும் நிதியமைச்சர் பொறுப்பு, அனுபவம் மிக்க மூத்த தலைவரான கே.ஏ. செங்கோட்டையன் அவர்களுக்கு ஒதுக்கப்பட்டுள்ளது. ஆரம்பத்தில் இத்துறையை முதலமைச்சர் விஜய் கவனிப்பார் என்று பேசப்பட்ட நிலையில், தீவிர ஆலோசனைகளுக்குப் பிறகு இந்த முடிவு எடுக்கப்பட்டுள்ளது.

நிதித்துறை என்பது மாநிலத்தின் அனைத்து துறைகளின் வளர்ச்சிக்கும், நிர்வாகச் செயல்பாடுகளுக்கும் அச்சாணியாக விளங்குவதாகும். இத்தகைய மிக முக்கியமான மற்றும் சவாலான துறையைக் கையாளுவதற்குத் தகுந்த நிர்வாகத் திறமையும், நீண்டகால முன் அனுபவமும் தேவை என்பதை உணர்ந்து, முதலமைச்சர் விஜய் இந்த சரியான முடிவை எடுத்துள்ளார் எனப் பலரும் பாராட்டி வருகின்றனர். புதிய அமைச்சரவையின் பதவியேற்பு விழாவின் போது, செங்கோட்டையன் அவர்கள் பதவியேற்க வந்த தருணத்தில் முதலமைச்சர் விஜய் எழுந்து நின்று அவருக்கு மரியாதை செலுத்திய நெகிழ்ச்சியான காட்சி, புதிய அரசு மூத்த தலைவர்களுக்கு அளிக்கும் முக்கியத்துவத்தையும், மரியாதையையும் வெளிப்படுத்துவதாக அமைந்தது.

நிதியமைச்சராகப் பொறுப்பேற்றுள்ள கே.ஏ. செங்கோட்டையன் தமிழக அரசியலில் 9 முறை சட்டமன்ற உறுப்பினராக (எம்.எல்.ஏ) வென்று சாதனை படைத்த ஒரு சூப்பர் சீனியர் தலைவர் ஆவார். 1977-ல் சத்தியமங்கலம் தொகுதியில் தொடங்கி, பின்னர் 1980 முதல் இன்று வரை கோபிசெட்டிபாளையம் தொகுதியில் (1996 தவிர) தொடர்ந்து மக்கள் ஆதரவோடு வெற்றி பெற்று வருகிறார். கடந்த கால அதிமுக ஆட்சிக்காலங்களில் போக்குவரத்துத் துறை, விவசாயம், தகவல் தொழில்நுட்பம், வருவாய்த்துறை மற்றும் பள்ளிக்கல்வித் துறை போன்ற பல்வேறு மிக முக்கிய அமைச்சகங்களை வெற்றிகரமாக வழிநடத்திய அசாத்திய நிர்வாக அனுபவம் இவருக்கு உண்டு.

1972-ல் எம்.ஜி.ஆர் திமுகவிலிருந்து விலகியபோது அவருடன் பயணித்து அதிமுகவை வலுப்படுத்திய செங்கோட்டையன், எம்.ஜி.ஆர் மற்றும் ஜெயலலிதா ஆகிய இருபெரும் தலைவர்களின் நம்பிக்கையைப் பெற்றவராகத் திகழ்ந்தார். தமிழக அரசியல் வரலாற்றில் அதிக முறை சட்டமன்ற உறுப்பினராக இருந்த துரைமுருகன் போன்ற தலைவர்களின் வரிசையில் இடம் பிடித்துள்ள இவர், தற்போது தவெக-வின் அவை முன்னோராக இருந்து புதிய அரசை வழிநடத்துகிறார். இவருடைய இந்த அரை நூற்றாண்டு கால அரசியல் மற்றும் நிர்வாக அனுபவம், விஜய் தலைமையிலான புதிய அமைச்சரவையின் நிதி மேலாண்மைக்கும், மக்கள் நலத்திட்டங்களுக்கும் பெரும் பலமாக அமையும் என்று அரசியல் நோக்கர்கள் கருதுகின்றனர்.