என்கிட்ட எதையும் மறைக்காதீங்க… தேர்தல் தோல்விக்கு பின் மு.க.ஸ்டாலின் போட்ட அதிரடி உத்தரவு..!

நடந்து முடிந்த தமிழக சட்டமன்றத் தேர்தலில் ஆளுங்கட்சியான திமுக பெரும் தோல்வியைச் சந்தித்தது. குறிப்பாக, முதலமைச்சராக இருந்த மு.க.ஸ்டாலின் தனது கொளத்தூர் தொகுதியிலேயே சுமார் 10 ஆயிரம் வாக்குகள் வித்தியாசத்தில் தோல்வி அடைந்தது அக்கட்சியினரிடையே பெரும் அதிர்ச்சியை ஏற்படுத்தியுள்ளது. இந்தத் தோல்விக்கான காரணங்களைக் கண்டறிந்து, 234 தொகுதிகளிலும் கள ஆய்வு செய்வதற்காக 36 பேர் கொண்ட ஆய்வுக் குழுவை திமுக தலைவர் மு.க.ஸ்டாலின் நியமித்துள்ளார்.

ஆய்வுக் குழுவினருடன் நடத்திய ஆலோசனைக் கூட்டத்திற்குப் பிறகு மு.க.ஸ்டாலின் தனது எக்ஸ் (ட்விட்டர்) பக்கத்தில், இந்த ஆய்வின் போது தனிப்பட்ட விருப்பு வெறுப்பின்றி தொண்டர்கள் சொல்லும் உண்மையை அப்படியே தன்னிடம் கூற வேண்டும் என்று உத்தரவிட்டுள்ளார். “யாரையும் காப்பாற்றவோ அல்லது பழிவாங்கவோ முயற்சிக்கக் கூடாது; ஒரு மருத்துவர் போல நான் இருக்கும் இந்தச் சூழ்நிலையில் என்னிடம் எதையும் மறைக்கக் கூடாது” என்று குறிப்பிட்டுள்ள அவர், கட்சியின் தலைவர் என்ற முறையில் தன் மீது குறை சொன்னாலும் அதையும் அறிக்கையில் துல்லியமாகப் பதிவு செய்ய வேண்டும் என்று கறாராகக் கூறியுள்ளார்.

கழகத்தினர் அளிக்கும் தகவல்களை ரகசியமாக வைக்க வேண்டும் என்றும், இந்தத் தகவல்களைச் சம்பந்தப்பட்ட நபர்களிடமே பகிர்ந்துகொண்டால் ஆய்வின் நோக்கமே வீணாகிவிடும் என்றும் அவர் எச்சரித்துள்ளார். மேலும், இந்த ‘ஸ்கேன் ரிப்போர்ட்’ போன்ற துல்லியமான அறிக்கை ஜூன் 5-ஆம் தேதிக்குள் சமர்ப்பிக்கப்பட வேண்டும் என்றும், அதன் அடிப்படையில் ஜூன் மாத இறுதிக்குள் தவறு செய்த நிர்வாகிகள் மீது கடுமையான சீர்திருத்த நடவடிக்கைகளும், மாற்றங்களும் எடுக்கப்படும் என்றும் மு.க.ஸ்டாலின் திட்டவட்டமாகத் தெரிவித்துள்ளார்.