தமிழக அரசியல் களத்தில் தவெக (தமிழக வெற்றிக் கழகம்) ஆட்சியைப் பிடித்ததைத் தொடர்ந்து, அக்கட்சியின் முதல் பொதுக்கூட்ட ஏற்பாடுகள் திருச்சியில் தீவிரமாக நடைபெற்று வருகின்றன. திருச்சி கிழக்கு தொகுதியில் வாக்காளர்களுக்கு நன்றி தெரிவிப்பதற்காக முதல்வர் விஜய் நாளை நேரில் வரவிருக்கிறார். இதுவரை ரோடு ஷோ பாணியிலேயே மக்களைச் சந்தித்து வந்த விஜய், ஆளுங்கட்சியாகப் பங்கேற்கும் முதல் அதிகாரப்பூர்வ கட்சிப் பொதுக்கூட்டம் இது என்பதால், தவெகவினர் மத்தியில் எதிர்பார்ப்பு வானளவிற்கு உயர்ந்துள்ளது. இதற்கான ஏற்பாடுகளை முன்னாள் அமைச்சர் கு.ப.கிருஷ்ணன் மற்றும் துணை சபாநாயகர் ரவிசங்கர் ஆகியோர் முன்னின்று கவனித்து வருகின்றனர்.
இந்நிலையில், இந்த ஏற்பாடுகள் குறித்து கு.ப.கிருஷ்ணன் மற்றும் ரவிசங்கர் ஆகிய இருவரும் செய்தியாளர்களைச் சந்தித்தபோது ஒரு சுவாரசியமான, அதேசமயம் சர்ச்சையான விவாதம் அரங்கேறியது. செய்தியாளர்கள், “திருச்சி கிழக்கு தொகுதியில் விஜய் இடத்தில் உங்களை வைத்துப் பார்க்கிறார்களே?” என்று கேள்வி எழுப்பினர். அதற்குப் பதிலளித்த கு.ப.கிருஷ்ணன், “எங்கள் தளபதிக்கு நிகராக மூவுலகிலும் ஆட்கள் கிடையாது” என்று உணர்ச்சிவசப்பட்டுக் கூறினார். அப்போது குறுக்கிட்ட துணை சபாநாயகர் ரவிசங்கர், “விஜய் என்று பெயரைச் சொல்ல வேண்டாம்.. முதல்வர் அல்லது சிஎம் என்று சொல்லுங்கள்” எனப் பத்திரிகையாளர்களுக்கு நிபந்தனை விதித்தார்.
துணை சபாநாயகரின் இந்தத் தடையை ஏற்கும் மனநிலையில் பத்திரிகையாளர்கள் இல்லை. அவர்கள் உடனடியாக, “உங்கள் கட்சியின் தலைவரை நீங்கள் பெயர் சொல்லி அழைக்காமல் இருப்பது உங்கள் உரிமை, ஆனால் பத்திரிகையாளர்களாகிய நாங்கள் பெயர் சொல்லி அழைப்பதில் எந்தத் தவறும் இல்லை, நாங்கள் பெயரைச் சொல்லலாம்” என்று அங்கேயே நேரடியாகப் பதிலடி கொடுத்தனர். இந்த வாக்குவாதம் அடங்கிய வீடியோக் காட்சி தற்போது சமூக வலைதளங்களில் காட்டுத்தீயாகப் பரவி, பெரும் விவாதப் பொருளாக மாறியுள்ளது.
இச்சம்பவம் குறித்து சமூக வலைதளங்களில் நெட்டிசன்கள் மற்றும் அரசியல் விமர்சகர்கள் தவெக நிர்வாகியின் செயலைக் கடுமையாக விமர்சித்து வருகின்றனர். திமுக, அதிமுக போன்ற பல தசாப்த கால பாரம்பரியக் கட்சிகளிலேயே கூட ஸ்டாலின், எடப்பாடி பழனிசாமி, கலைஞர், ஜெயலலிதா எனத் தலைவர்களின் பெயர்களைப் பத்திரிகையாளர்கள் வெளிப்படையாகக் குறிப்பிட்டுத்தான் கேள்வி கேட்பார்கள் என்றும், இப்போதுதான் ஆட்சிக்கு வந்துள்ள தவெக அதற்குள்ளாகவே ஊடகங்களுக்குக் கட்டுப்பாடு விதிப்பது அநாகரீகமானது என்றும் விமர்சனங்கள் எழுந்துள்ளன. திராவிடக் கட்சிகளின் ‘தலைவர் பக்தி’ கலாச்சாரத்தை எதிர்க்கப் போவதாகக் கூறி வந்த தவெக, தற்போது அதே அதிதீவிர ஆராதனை கலாச்சாரத்திற்குள் சிக்கியிருப்பதை இச்சம்பவம் காட்டுவதாக அரசியல் வட்டாரங்கள் சுட்டிக்காட்டுகின்றன.