கர்நாடகாவின் ரூ.7,150 கோடி மேகதாது பிளான்… சட்டசபையில் இன்று விஜய் செய்யப்போகும் சம்பவம்…. மேகதாது விவகாரத்தில் வெடித்த புதிய போர்க்களம்…!

காவிரி ஆற்றின் குறுக்கே மேகதாதுவில் புதிய அணை கட்ட முயலும் கர்நாடக அரசின் நடவடிக்கைக்கு எதிராக, தமிழக சட்டசபையில் முதலமைச்சர் விஜய் இன்று தனித்தீர்மானம் கொண்டு வருகிறார். தமிழகத்தின் நதிநீர் உரிமைகளை நிலைநாட்டுவதில் தனது அரசு எவ்வித சமரசமும் செய்து கொள்ளாது என்பதை உணர்த்தும் வகையில் முதலமைச்சரின் இந்த முதல் பெரிய புவிசார் அரசியல் நகர்வு அமைந்துள்ளது. டெல்டா மாவட்டங்களின் வாழ்வாதாரமாக விளங்கும் காவிரி விவகாரம், தமிழக அரசியலில் தலைவர்களின் ஆளுமைக்கான அக்னிப் பரீட்சையாகவே பார்க்கப்படுகிறது. மேகதாது அணைத் திட்டத்திற்கு ஒன்றிய அரசு எவ்வித சுற்றுச்சூழல் மற்றும் தொழில்நுட்ப அனுமதிகளையும் வழங்கக் கூடாது என்று ஒட்டுமொத்த தமிழகத்தின் குரலாக இந்தத் தீர்மானம் ஒலிக்கவுள்ளது.

மறுபுறம், பெங்களூரு மாநகர மக்களின் அசுர வேக குடிநீர்த் தேவையைப் பூர்த்தி செய்யவே இந்த ₹7,150 கோடி மதிப்பிலான அணைத் திட்டம் என கர்நாடக முதலமைச்சர் டி.கே. சிவகுமார் வாதிடுகிறார். இத்திட்டத்தின் மூலம் விவசாயத்திற்குப் பாசன நீர் எடுக்கப் போவதில்லை என்றும், கடந்த காலங்களில் கடலில் கலந்த உபரி நீரைச் சேமிப்பதன் மூலம் வறட்சி காலங்களில் தமிழ்நாட்டிற்கே இது பயனுள்ளதாக இருக்கும் என்றும் அவர் சமாதானம் கூறுகிறார். இத்திட்டத்தின் மூலம் 400 மெகாவாட் மின்சாரம் தயாரிக்கவும், குடிநீர் தேவையைத் தீர்க்கவும் திருத்தப்பட்ட விரிவான திட்ட அறிக்கையை மத்திய நீர் ஆணையத்திடம் கர்நாடக அரசு ஏற்கனவே சமர்ப்பித்து, இதற்கான அனுமதிகளைப் பெற பிரதமர் நரேந்திர மோடியைச் சந்தித்து தீவிரமாக வலியுறுத்தி வருகிறது.

இருப்பினும், கர்நாடகா மேகதாதுவில் பிரம்மாண்ட அணையைக் கட்டினால் காவிரியின் முழுக் கட்டுப்பாடும் அம்மாநிலத்தின் கைக்குச் சென்றுவிடும் என்பதே தமிழகத்தின் முதன்மையான கவலையாக உள்ளது. கீழ்மடை மாநிலமான தமிழ்நாட்டின் ஒப்புதல் இன்றி, காவிரியின் குறுக்கே எந்தவொரு புதிய கட்டுமானத்தையும் மேற்கொள்வது பன்னெடுங்காலமாகப் பின்பற்றப்படும் மாநிலங்களுக்கு இடையேயான நதிநீர் பகிர்வுக் கொள்கைகளுக்கும் உச்ச நீதிமன்றத் தீர்ப்புகளுக்கும் எதிரானது ஆகும். இந்த அணை கட்டப்பட்டால், தமிழகத்தின் நெற்களஞ்சியமான காவிரி டெல்டா மாவட்டங்கள் நாளடைவில் வறண்ட பாலைவனமாக மாறி, லட்சக்கணக்கான விவசாயிகளின் வாழ்வாதாரம் முற்றிலுமாகப் பாதிக்கப்படும் என்று தமிழக அரசியல் கட்சிகளும் விவசாய அமைப்புகளும் ஒருமித்த குரலில் எச்சரிக்கின்றன.

இந்த நதிநீர் உரிமைப் போரில் தமிழகத்திற்கு ஆதரவாகப் பக்கத்து மாநிலங்களான கேரளாவும், புதுச்சேரியும் கைகோர்த்துள்ளன. காவிரியின் கீழ்மடைப் பாசனப் பயனாளிகளாக உள்ள இந்த மாநிலங்களும் கர்நாடகாவின் தன்னிச்சையான மேகதாது அணைத் திட்டத்திற்குத் தங்களது கடுமையான எதிர்ப்பைப் பதிவு செய்துள்ளன. தமிழ்நாட்டின் நதிநீர் உரிமைகளைக் காப்பதில் தனது அரசு ஒரு அங்குலம் கூட பின்வாங்காது என்பதை முதலமைச்சர் விஜய் இந்தத் தீர்மானத்தின் மூலம் அழுத்தமாக உணர்த்தியுள்ள நிலையில், மாநிலங்களுக்கு இடையேயான இந்த புவிசார் அரசியல் மோதலில் ஒன்றிய அரசின் இறுதி நிலைப்பாடு என்னவாக இருக்கும் என்பதே இப்போது பெரும் எதிர்பார்ப்பை ஏற்படுத்தியுள்ளது.