தமிழகத்திற்குப் புதிய தொழில் முதலீடுகளை ஈர்க்கும் நோக்கில் 6 நாள் அதிகாரப்பூர்வப் பயணமாக லண்டன் சென்றுள்ள முதல்வர் விஜய், அங்குள்ள புகழ்பெற்ற ‘தி ஷார்ட்’ (The Shard) நட்சத்திர விடுதியில் தங்கியுள்ளார். ஐரோப்பாவின் மிக உயரமான கட்டடங்களில் ஏழாவது இடத்தில் இருக்கும் இந்த விடுதியிலிருந்து ஒட்டுமொத்த லண்டன் நகரத்தின் அழகையும் ரசிக்க முடியும். இங்குள்ள அறைகளின் ஒரு நாள் வாடகை இந்திய மதிப்பில் ரூ.70 ஆயிரம் முதல் ரூ.1.60 லட்சம் வரை மாறுபடுகிறது. மேலும், பிரம்மாண்ட உணவகங்கள் மற்றும் மிக உயரத்தில் அமைக்கப்பட்ட நீச்சல் குளம் உள்ளிட்ட பல்வேறு சிறப்பு வசதிகள் இந்த விடுதியில் இடம்பெற்றுள்ளன.
முதல்வராகப் பொறுப்பேற்ற பிறகு மேற்கொள்ளப்படும் முதல் வெளிநாட்டுப் பயணம் இது என்பதால், இதன் மீது பெரும் எதிர்பார்ப்பு நிலவுகிறது. இந்த லண்டன் பயணத்தின் போது, பல்வேறு முன்னணி நிறுவனங்களின் தொழிலதிபர்களைச் சந்தித்து தமிழகத்தில் தொழில் தொடங்குவது மற்றும் முதலீடுகளை மேற்கொள்வது தொடர்பாக விரிவான ஆலோசனைகள் நடத்தப்படவுள்ளன. இதன் மூலம் மாநிலத்தில் புதிய வேலைவாய்ப்புகளும் உள்கட்டமைப்பு வளர்ச்சியும் கணிசமாக அதிகரிக்கும் என்று எதிர்பார்க்கப்படுகிறது.
இப்பயணத்தின் ஒரு பகுதியாக, உலகப் புகழ்பெற்ற ‘சில்வர்ஸ்டோன் மோட்டார் ரேசிங் சர்க்யூட்’ (Silverstone Motor Racing Circuit) பந்தய மைதானத்தை நேரில் சென்று பார்வையிடவும் திட்டமிடப்பட்டுள்ளது. சர்வதேச அளவிலான மோட்டார் ஸ்போர்ட்ஸ் உள்கட்டமைப்பு, விளையாட்டு சார்ந்த சுற்றுலா மற்றும் சிறப்பு வாகனத் தொழில்நுட்பங்களின் சிறந்த நடைமுறைகளைக் கண்டறிந்து, அவற்றை தமிழகத்தில் செயல்படுத்துவதற்கான சாத்தியக்கூறுகளை ஆராய்வதே இதன் முதன்மை நோக்கமாகும்.