விஜய் போட்ட அந்த ஒரு ‘அதிரடி’ உத்தரவு.. அலறும் அதிகாரிகள்…. தமிழகத்தில் மாறப்போகும் முக்கிய சிஸ்டம்… பரபரக்கும் கோட்டை…!

தமிழக மதுவிலக்கு மற்றும் ஆயத்தீர்வை துறையின் செயல்பாடுகளை முற்றிலும் சீரமைக்கும் நோக்கில், முதல்வர் விஜய் எடுத்துள்ள புதிய முடிவு அரசியல் மற்றும் அரசு நிர்வாக வட்டாரங்களில் பெரும் பரபரப்பை ஏற்படுத்தியுள்ளது. கர்நாடகா, தெலங்கானா மற்றும் ஆந்திரப் பிரதேசம் ஆகிய அண்டை மாநிலங்களில் செயல்பட்டு வரும் மதுபான விநியோக முறைகள் மற்றும் வருவாய் மாதிரிகள் குறித்து விரிவாக ஆய்வு செய்து அறிக்கை சமர்ப்பிக்க ஒரு உயர்மட்டக் குழுவை அமைக்குமாறு அவர் அதிரடி உத்தரவு பிறப்பித்துள்ளார். தமிழகத்தின் நிர்வாகத்திலும் கொள்கைகளிலும் பல அதிரடி மாற்றங்களை மேற்கொண்டு வரும் முதல்வர், தற்போது தமிழகத்தின் மதுபான விற்பனை ஸ்டைலையே மாற்றும் புதிய முயற்சியில் இறங்கியுள்ளார்.

தமிழகத்தில் அரசு நிர்வாகத்தின் கீழ் செயல்படும் டாஸ்மாக் நிறுவனத்தில் நிலவி வரும் முறைகேடுகள், வருவாய் இழப்புகள் மற்றும் போலி மதுபான புழக்கம் போன்ற நீண்டகாலப் பிரச்சினைகளுக்கு நிரந்தர தீர்வு காண்பதே இந்த ஆய்வின் முதன்மை நோக்கமாகும். அண்டை மாநிலங்களில் மதுபான விற்பனை மற்றும் ஆயத்தீர்வை வசூல் எவ்வாறு ஆன்லைன் மயமாக்கப்பட்டு, வெளிப்படைத்தன்மையுடன் நடத்தப்படுகிறது என்பதை இந்த உயர்மட்டக் குழு ஆராயவுள்ளது. மூத்த ஐஏஎஸ் அதிகாரிகள் மற்றும் ஆயத்தீர்வை துறை நிபுணர்கள் இடம்பெறும் இக்குழு, மூன்று மாநிலங்களுக்கும் நேரடியாகச் சென்று ஆய்வு நடத்தி விரிவான அறிக்கையை அரசிடம் சமர்ப்பிக்க உள்ளது.

அண்டை மாநிலங்களில் நிலவும் நவீன மதுபான கலாச்சாரம் மற்றும் அங்கு தங்கு தடையின்றி கிடைக்கும் வெளிநாட்டு பிராண்டுகள் போன்றவை ‘ஜென் ஜி’ (Gen Z) எனப்படும் இளம்தலைமுறையினரை வெகுவாக ஈர்த்து வருகின்றன. ஆனால், சென்னையில் அத்தகைய சூழல் இல்லை என்ற குறைபாட்டை போக்கவும் முதல்வர் திட்டமிட்டுள்ளார். அங்குள்ள சிறந்த மற்றும் வெளிப்படையான நடைமுறைகளைத் தமிழகத்திலும் செயல்படுத்துவதன் மூலம், தற்போதைய டாஸ்மாக் கட்டமைப்பில் உள்ள ஓட்டைகளை அடைத்து, நிர்வாகத்தை அடுத்த கட்டத்திற்கு கொண்டு செல்ல அரசு திட்டமிட்டு வருகிறது.

முதல்வர் விஜய்யின் இந்த அதிரடி நடவடிக்கையைத் தொடர்ந்து, தமிழகத்தில் மதுபான விற்பனை விரைவில் தனியார்மயமாக்கப்பட வாய்ப்புள்ளதா என்ற விவாதம் பரவலாக எழுந்துள்ளது. குறிப்பாக, ஆந்திரா மற்றும் கர்நாடகாவில் மதுபான சில்லறை விற்பனையில் தனியார் பங்களிப்பு நடைமுறையில் உள்ளது. தமிழகத்தில் ஏற்கனவே பொறுப்பேற்றவுடன் முதற்கட்டமாக 717 டாஸ்மாக் கடைகளை மூட முதல்வர் உத்தரவிட்டிருந்த நிலையில், சட்டம்-ஒழுங்கு பிரச்சினைகள் மற்றும் முறைகேடுகளைத் தவிர்க்க படிப்படியாக அரசு தனது கட்டுப்பாட்டைக் குறைத்துக் கொண்டு, விற்பனையைத் தனியார் வசம் ஒப்படைக்கக்கூடும் என்ற எதிர்பார்ப்பு நிலவுகிறது. இந்த உயர்மட்டக் குழுவின் அறிக்கை வெளியான பிறகு, மதுபான விற்பனையில் தனியார் பங்களிப்பு குறித்த முக்கிய அறிவிப்புகள் வெளியாகலாம் என நிபுணர்கள் கருதுகின்றனர்.