சென்னை வள்ளுவர் கோட்டத்தில் நடைபெற்ற தமிழ் தேசிய எழுச்சி மாநாட்டில் விடுதலைச் சிறுத்தைகள் கட்சியின் தலைவர் தொல். திருமாவளவன் கலந்து கொண்டு உரையாற்றினார். அப்போது, அண்மையில் உளுந்தூர்பேட்டையில் மாபெரும் வெற்றியைப் பெற்ற விசிகவின் மாநாடு குறித்து நினைவுகூர்ந்து பேசினார். அந்த மாநாடு நிறைவுற்றதும், தமிழக முதலமைச்சரும் தமிழக வெற்றிக் கழகத்தின் தலைவருமான விஜய் நேரடியாகத் தொடர்பு கொண்டு, “சார், மிரட்டிட்டீங்க.. ஃபயர்.. ஃபயர்..” என்று மனதாரப் பாராட்டிய செய்தியை திருமாவளவன் இம்மாநாட்டில் வெளிப்படையாகப் பகிர்ந்துகொண்டார்.
நடந்து முடிந்த 2026 சட்டமன்றத் தேர்தலில் 108 தொகுதிகளில் வெற்றி பெற்ற தமிழக வெற்றிக் கழகம், காங்கிரஸ், சிபிஐ, சிபிஎம், இந்திய யூனியன் முஸ்லிம் லீக் மற்றும் விசிக ஆகிய கட்சிகளின் ஆதரவோடு ஆட்சியை அமைத்துள்ளது. இதில் காங்கிரஸ் கட்சி தவெகவுடனான தனது கூட்டணியை உறுதிப்படுத்திய நிலையில், இடதுசாரி கட்சிகளான சிபிஐ மற்றும் சிபிஎம் வெளியிலிருந்து ஆட்சிக்கு ஆதரவு அளிப்பதாக அறிவித்தன. ஆரம்பத்தில் அமைதி காத்து வந்த விசிக, உளுந்தூர்பேட்டை மாநாட்டில்தான் தவெகவுடனான கூட்டணியை அதிகாரப்பூர்வமாக அறிவித்து, அடுத்த 5 ஆண்டுகளுக்குத் தங்களின் ஆதரவு தவெக அரசிற்கே தொடரும் என்பதை தெளிவுபடுத்தியது.
மாநாட்டின் வெற்றிக்குப் பிறகு முதலமைச்சர் விஜய்யைச் சந்தித்த அனுபவத்தைப் பகிர்ந்த திருமாவளவன், “மறுநாள் சென்னை தலைமைச் செயலகத்தில் முதல்வரை நேரில் சந்தித்தபோதும் அவர் அதே உற்சாகத்துடன் பாராட்டு தெரிவித்தார். முதலமைச்சர் விஜய்க்கு எந்தவித வயிற்றெரிச்சலோ, அரசியல் போட்டியோ அல்லது பொறாமையோ கிடையாது. மற்றவர்களின் உழைப்பையும் வெற்றியையும் மனம்திறந்து பாராட்டுகின்ற மாபெரும் பெருந்தன்மை அவரிடம் நிறைந்துள்ளது” என்று புகழாரம் சூட்டினார்.
திமுக மற்றும் அதிமுக ஆட்சிக் காலங்களில் தலித் மக்களுக்குச் செய்யப்பட்ட நன்மைகள் குறித்த கேள்விகளுக்கும், தற்போதைய அரசியல் சூழல்களுக்கும் பதிலளிக்கும் விதமாக அமைந்த திருமாவளவனின் இந்த உரை, தமிழக அரசியல் வட்டாரத்தில் பெரும் விவாதத்தையும் கவனத்தையும் ஈர்த்துள்ளது. தவெக – விசிக இடையிலான இந்த இணக்கமான உறவும் பரஸ்பர மரியாதையும், வரவிருக்கும் காலங்களில் தமிழக அரசியலில் புதிய மாற்றங்களுக்கும் கூட்டணி நகர்வுகளுக்கும் வலுவான அடித்தளமாக அமையும் எனக் கருதப்படுகிறது.