“1800 பேருக்கு வேலை உறுதி – 117 கோடியில் மாஸ் திட்டம்”…. இனி சொந்த ஊரிலேயே ரூ. 50,000 சம்பளத்தில் வேலை…. முதலமைச்சரின் மெகா கிப்ட்…!

தமிழகத்தின் தகவல் தொழில்நுட்ப வளர்ச்சியை அடுத்த கட்டத்திற்கு கொண்டு செல்லும் வகையில், இரண்டாம் மற்றும் மூன்றாம் நிலை நகரங்களில் மினி டைடல் பூங்காக்களை தமிழக அரசு உருவாக்கி வருகிறது. இதன் ஒரு பகுதியாக, திருநெல்வேலி, விருதுநகர் மற்றும் ஈரோடு ஆகிய மாவட்டங்களில் புதிய மினி டைடல் பூங்காக்கள் அமைப்பதற்கான அடிக்கல் நாட்டு விழா இன்று நடைபெற்றது. தமிழக முதலமைச்சர் மு.க. ஸ்டாலின் அவர்கள் சென்னை தலைமைச் செயலகத்திலிருந்து காணொலிக்காட்சி வாயிலாக இந்த மூன்று முக்கியத் திட்டங்களுக்கும் அடிக்கல் நாட்டி, பணிகளை முறைப்படி தொடங்கி வைத்தார்.

தொழில், முதலீட்டு ஊக்குவிப்பு மற்றும் வர்த்தகத் துறை சார்பில் சுமார் 117 கோடி ரூபாய் மதிப்பீட்டில் இந்தத் திட்டங்கள் செயல்படுத்தப்பட உள்ளன. அதன்படி, நெல்லை மாவட்டம் ரெட்டியார்பட்டியில் 39.06 கோடி ரூபாயிலும், விருதுநகர் மாவட்டம் கூரைக்குண்டில் 38.72 கோடி ரூபாயிலும், ஈரோடு மாவட்டம் கங்காபுரத்தில் 39.87 கோடி ரூபாயிலும் இந்த நவீனப் பூங்காக்கள் அமையவுள்ளன. ஒவ்வொரு பூங்காவும் தரைத்தளம் மற்றும் மூன்று தளங்களுடன் சுமார் 60,000 சதுர அடி பரப்பளவில், உலகத்தரம் வாய்ந்த உட்கட்டமைப்பு வசதிகளுடன் கட்டப்பட உள்ளன.

இந்தத் திட்டத்தின் மிக முக்கியமான சிறப்பம்சமே வேலைவாய்ப்பு உருவாக்கம் தான். இந்த மூன்று மினி டைடல் பூங்காக்களின் மூலம் தலா 600 பேர் வீதம் மொத்தம் 1,800 தகவல் தொழில்நுட்ப வல்லுநர்களுக்கு நேரடியாக வேலைவாய்ப்பு கிடைக்கும் என எதிர்பார்க்கப்படுகிறது. ஏற்கனவே விழுப்புரம், தஞ்சாவூர் உள்ளிட்ட மாவட்டங்களில் இத்தகைய பூங்காக்கள் வெற்றிகரமாகச் செயல்பட்டு வரும் நிலையில், புதிய மாவட்டங்களில் இவை அமைக்கப்படுவது படித்த இளைஞர்களிடையே பெரும் வரவேற்பைப் பெற்றுள்ளது.

இந்த மினி டைடல் பூங்காக்களின் நோக்கம், கிராமப்புற மற்றும் சிறு நகரங்களைச் சேர்ந்த இளைஞர்கள் வேலை தேடி சென்னை போன்ற பெருநகரங்களுக்குச் செல்வதைத் தவிர்ப்பதாகும். இதன் மூலம் இளைஞர்கள் தங்களின் சொந்த ஊரிலேயே உயர்தரமான ஐடி வேலைகளைப் பெற முடியும். இந்த முயற்சியானது உள்ளூர் பொருளாதாரத்தை மேம்படுத்துவதுடன், தமிழகத்தின் ஒட்டுமொத்த தொழில் வளர்ச்சியையும் பரவலாக்க உதவும் என்று அரசு தரப்பில் தெரிவிக்கப்பட்டுள்ளது.