மதுராந்தகம் மற்றும் தாராபுரம் ஆகிய இரு சட்டமன்றத் தொகுதிகளுக்கான இடைத்தேர்தல் அறிவிக்கப்பட்டுள்ளதைத் தொடர்ந்து, தமிழகத்தில் அரசியல் களம் சூடுபிடித்துள்ளது. வரவிருக்கும் அக்டோபர் 6-ஆம் தேதி வாக்குப்பதிவும், அக்டோபர் 9-ஆம் தேதி வாக்கு எண்ணிக்கையும் நடைபெறவுள்ள நிலையில், இவ்விரு தொகுதிகளிலும் தேர்தல் நடத்தை விதிகள் உடனடியாக அமலுக்கு வந்துள்ளன. இத்தேர்தலில் ஆளும்கட்சியான திமுக சார்பில் மதுராந்தகத்தில் பரந்தாமன், தாராபுரத்தில் சுகன்யா போட்டியிடுகின்றனர். அதிமுக சார்பில் கணிதா சம்பத் மற்றும் பானுமதி ஆகியோர் களமிறக்கப்பட்டுள்ளனர்.
தமிழக வெற்றிக் கழகம் சார்பில், மதுராந்தகம் தொகுதியில் மரகதம் குமரவேலும், தாராபுரம் தொகுதியில் சத்தியபாமாவும் வேட்பாளர்களாகக் களமிறக்கப்பட்டுள்ளனர். தவெக சார்பில் போட்டியிடும் இவ்விரு வேட்பாளர்களும் கடந்த ஏப்ரல் மாதம் நடைபெற்ற சட்டமன்றத் தேர்தலில் அதிமுக சார்பில் வெற்றி பெற்று, பின்னர் தங்கள் பதவிகளை ராஜினாமா செய்தவர்கள் என்பது குறிப்பிடத்தக்கது. தமிழகத்தில் தவெக அரசு அமைந்த பிறகு சந்திக்கும் முதல் இடைத்தேர்தல் என்பதால், இரு தொகுதிகளையும் கைப்பற்றி புதிய வரலாற்றுச் சாதனை படைக்க அக்கட்சி தீவிரமாக ஆயத்தமாகி வருகிறது.
இடைத்தேர்தல் பணிகளைத் துரிதப்படுத்தவும் சீராகக் கண்காணிக்கவும் தேர்தல் பணிக்குழு மற்றும் கண்காணிப்பாளர்களை நியமித்து தமிழக வெற்றிக் கழகத் தலைவரும், முதலமைச்சருமான விஜய் அதிகாரப்பூர்வ உத்தரவை வெளியிட்டுள்ளார். அதன்படி, தேர்தல் பணிகளைக் கண்காணிக்க அமைச்சர்கள் ஆனந்த், செங்கோட்டையன் மற்றும் CTR நிர்மல் குமார் ஆகிய மூவரும் கண்காணிப்பாளர்களாக நியமிக்கப்பட்டுள்ளனர். இவர்கள் இருவரும் தொகுதிகளின் தேர்தல் பணிகளை முழுமையாக மேற்பார்வையிடுவார்கள்.
கூடுதலாக, மதுராந்தகம் தொகுதி தேர்தல் பொறுப்பாளராக அமைச்சர் ஆதவ் அர்ஜுனாவும், தாராபுரம் தொகுதி தேர்தல் பொறுப்பாளராக அமைச்சர் அருண்ராஜும் நியமிக்கப்பட்டுள்ளனர். இவர்களுடன் இணைப் பொறுப்பாளர்கள் மற்றும் எம்.எல்.ஏ-க்கள் அடங்கிய துணைப் பொறுப்பாளர்கள் குழுவும் களப்பணியாற்றவுள்ளது. ‘விசில்’ சின்னத்தில் வரலாற்றுச் சிறப்புமிக்க வெற்றியைப் பெறக் கழகத் தோழர்கள் அனைவரும் முழு ஒத்துழைப்பு நல்கி உழைக்க வேண்டும் எனக் கேட்டுக்கொண்டுள்ள தவெக தலைவர் விஜய், விரைவில் இரு தொகுதிகளிலும் மக்கள் சந்திப்புப் பிரச்சார நிகழ்ச்சிகள் முன்னெடுக்கப்படும் என்றும் தெரிவித்துள்ளார்.