தமிழகத்தில் அரசுப் பள்ளி மாணவர்களின் மருத்துவக் கனவை நனவாக்கும் வகையில், MBBS மற்றும் BDS படிப்புகளுக்கான உள் இடஒதுக்கீட்டை தற்போதைய 7.5%-லிருந்து 10% ஆக உயர்த்துவதற்கு முதலமைச்சர் விஜய் திட்டமிட்டுள்ளதாகத் தகவல்கள் வெளியாகியுள்ளன. இந்த முக்கிய முடிவைச் சட்டப்பூர்வமாகவும் எவ்விதச் சிக்கல்களுமின்றியும் செயல்படுத்துவதற்காக, சுகாதாரத்துறை உயர் அதிகாரிகள் மற்றும் சட்ட வல்லுநர்களுடன் அவர் விரைவில் விரிவான ஆலோசனை நடத்த உள்ளார்.
தற்போது நடைமுறையில் உள்ள 7.5% உள் இடஒதுக்கீட்டின் மூலம் ஆண்டுதோறும் சுமார் 625 அரசுப் பள்ளி மாணவர்கள் மருத்துவக் கல்லூரிகளில் சேர்ந்து பயன் பெற்று வருகின்றனர். இந்த இடஒதுக்கீடு வரம்பு 10% ஆக உயர்த்தப்படும் பட்சத்தில், மருத்துவக் கல்வியில் சேரும் அரசுப் பள்ளி மாணவர்களின் எண்ணிக்கை குறிப்பிடத்தக்க அளவில் அதிகரிக்கும். இதன் மூலம் ஒவ்வொரு ஆண்டும் 800-க்கும் மேற்பட்ட ஏழை மற்றும் கிராமப்புற மாணவர்கள் தங்களின் மருத்துவக் கனவை எட்டிப் பிடித்துப் பயனடைவார்கள் என எதிர்பார்க்கப்படுகிறது.