“பள்ளிக்கே போக பயமா இருக்கு!”… தற்கொலைக்கு முயன்ற 12-ஆம் வகுப்பு மாணவி… தலைமை ஆசிரியர் செய்த கொடூர செயல்… அரசுப் பள்ளியில் வெடித்த விபரீதம்…!!

மயிலாடுதுறை மாவட்டம் கீழப்பெரும்பள்ளம் அரசு மேல்நிலைப் பள்ளியில், தலைமை ஆசிரியர் இந்திரகுமார் மற்றும் சில ஆசிரியர்களுக்கு இடையே பனிப்போர் நிலவி வந்துள்ளது. இது குறித்த கல்வித்துறையின் விசாரணையின்போது, தனக்குச் சாதகமாகப் பேசுமாறு தலைமை ஆசிரியர் மாணவர்களைக் கட்டாயப்படுத்தியதாகக் கூறப்படுகிறது. இதற்குச் சம்மதிக்காத 12-ஆம் வகுப்பு மாணவி ஒருவரை அவர் தொடர்ந்து குறிவைத்து அவதூறாகப் பேசியதால், கடும் மன உளைச்சலுக்கு ஆளான அந்த மாணவி தனது வீட்டில் மண்ணெண்ணெய் குடித்துத் தற்கொலைக்கு முயன்றுள்ளார்.

ஆபத்தான நிலையில் மீட்கப்பட்ட அந்த மாணவி, மயிலாடுதுறை அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளார். தலைமை ஆசிரியரைப் பார்க்கவே அச்சமாக இருப்பதாக அந்த மாணவி தெரிவித்துள்ள நிலையில், மாவட்ட முதன்மைக் கல்வி அலுவலர் பாலசுப்பிரமணியன் மருத்துவமனைக்கு நேரில் சென்று விசாரணை நடத்தினார். மாணவியின் உடல்நலம் தேறிய பிறகே அடுத்தகட்ட நடவடிக்கைகள் தீவிரமாக எடுக்கப்படும் என அவர் தெரிவித்துள்ள நிலையில், ஆசிரியர்களின் மோதலால் மாணவி தற்கொலைக்கு முயன்ற இச்சம்பவம் அப்பகுதியில் பெரும் அதிர்வலைகளை ஏற்படுத்தியுள்ளது.