டெல்லியில் ரத்தக் களரி… தமிழ்நாட்டில் அமைதி… பாஜகவுக்கு பயந்துட்டாரா CM விஜய்?… திமுகவின் ‘ஒன்றிய அரசு’ எங்கே?… தமிழக அரசியலில் வெடித்த பூகம்பம்…!

டெல்லியில் நீட் தேர்வு முறைகேடுகளுக்கு எதிராக சிஜேபி அமைப்பினர் நடத்திய பேரணியில், மாணவர்கள் மற்றும் பெண்கள் மீது காவல்துறையினர் நடத்திய அத்துமீறல்களும் தாக்குதல்களும் நாடு முழுவதும் கடும் அதிர்வலைகளை ஏற்படுத்தியுள்ளன. தேசிய அளவில் பல்வேறு அரசியல் தலைவர்களும் இச்சம்பவத்திற்குக் கடும் கண்டனங்களைப் பதிவு செய்து வரும் நிலையில், எப்போதும் பாஜகவின் கொள்கைகளைத் தீவிரமாக எதிர்க்கும் தமிழ்நாட்டின் அரசியல் களத்தில் தற்போது நிலவும் அமைதியும் மெத்தனப் போக்கும் பொதுமக்கள் மற்றும் நெட்டிசன்கள் மத்தியில் பெரும் விவாதத்தைக் கிளப்பியுள்ளது.

குறிப்பாக, தமிழக ஆளுங்கட்சியான தவெகவின் தலைவரும் முதலமைச்சருமான விஜய், நீட் மறுதேர்வு அழுத்தத்தால் மாணவர்கள் உயிரிழந்த சம்பவம் குறித்தோ அல்லது டெல்லியில் மாணவர்கள் மீது அவிழ்த்துவிடப்பட்ட வன்முறை குறித்தோ உறுதியான கண்டனங்களைப் பதிவு செய்யவில்லை என்ற விமர்சனம் எழுந்துள்ளது. தேர்தலுக்கு முன்பாக தீவிர பாஜக எதிர்ப்பைக் கையில் எடுத்தவர், தற்போது ஆட்சியைத் தக்கவைக்கவும் மத்திய அரசின் ஆதரவைப் பெறவும் பாஜகவைக் விமர்சிக்க அஞ்சுகிறாரா என்ற கேள்விகளைச் சமூக வலைதளங்களில் நெட்டிசன்கள் சரமாரியாக எழுப்பி வருகின்றனர்.

மறுபுறம், எதிர்க்கட்சித் தலைவரான உதயநிதி ஸ்டாலின் இச்சம்பவம் தொடர்பாக வெளியிட்ட பதிவில், வழக்கமாக திமுக பயன்படுத்தும் ”ஒன்றிய அரசு” என்ற சொல்லாடலையோ அல்லது நேரடி பாஜக எதிர்ப்பையோ வெளிப்படுத்தாமல், காவல்துறையின் நடவடிக்கையை மட்டும் பொதுவாகக் கண்டித்துள்ளார். தேர்தலுக்குப் பிறகு திமுக மற்றும் தவெக ஆகிய இரு துருவங்களின் தீவிர பாஜக எதிர்ப்புப் போக்குகளும் தங்களின் அரசியல் கணக்குகளுக்காக நீர்த்துப்போய்விட்டனவா என்ற ஆதங்கத்தோடு பொதுமக்கள் இணையத்தில் கேள்விகளை எழுப்பி வருகின்றனர்.