“பால் குடுத்து தூங்க வச்சேன்.. ஆனா”… போலியோ மருந்து போட்ட குழந்தை பலி… தமிழகத்தில் அதிர்ச்சி…!

கடலூர் மாவட்டம் நல்லாத்தூரைச் சேர்ந்த ஓட்டுநர் ராஜியின் ஒன்றரை வயது ஆண் குழந்தை ஹரிஹரன் , நேற்று நடைபெற்ற போலியோ முகாமில் சொட்டு மருந்து கொடுக்கப்பட்ட சில மணி நேரங்களிலேயே பரிதாபமாக உயிரிழந்த சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது. முகாமில் சொட்டு மருந்து கொடுக்கப்பட்டு வீட்டிற்கு அழைத்து வரப்பட்ட குழந்தைக்கு, அவரது தாய் ராஜம் பால் கொடுத்து உறங்க வைத்துள்ளார்.

ஆனால், மதிய வேளையில் குழந்தை திடீரென மயக்கமடைந்ததைக் கண்டு அதிர்ச்சியடைந்த பெற்றோர், உடனடியாக அவரை ஆரம்ப சுகாதார நிலையத்திற்கும், பின்னர் மேல் சிகிச்சைக்காக கடலூர் அரசு மருத்துவமனைக்கும் கொண்டு சென்றனர். எனினும், மருத்துவமனைக்குச் செல்லும் வழியிலேயே குழந்தை ஏற்கனவே இறந்துவிட்டதாக மருத்துவர்கள் தெரிவித்துள்ள நிலையில், இதுகுறித்து வழக்குப் பதிவு செய்துள்ள காவல்துறையினர் தீவிர விசாரணை மேற்கொண்டு வருகின்றனர். குழந்தையின் மரணத்திற்கான உண்மைப் பின்னணி மற்றும் துல்லியமான காரணம் பிரேத பரிசோதனை அறிக்கை வந்த பிறகே முழுமையாகத் தெரியவரும் என மருத்துவர்கள் மற்றும் அதிகாரிகள் தரப்பில் தெரிவிக்கப்பட்டுள்ளது.