கர்நாடக மாநிலம் பெங்களூரு மடிவாளா காவல் எல்லைக்கு உட்பட்ட சிக்க அடுகோடி பகுதியில், 1 1/2 வயது குழந்தை ஒன்று வீட்டின் பால்கனி அருகே தனியாக விளையாடிக் கொண்டிருந்த போது எதிர்பாராதவிதமாக ஆபத்தில் சிக்கியுள்ளது. ஆகஸ்ட் 15 சுதந்திர தின நாளன்று காலை 10:50 மணியளவில், பெற்றோர் கவனிக்காத நேரத்தில் பால்கனி கிரில் மீது ஏறிய அக்குழந்தை, எதிர்பாராதவிதமாகத் தவறி 3வது மாடியில் இருந்து கீழே விழுந்தது.
கீழே விழுந்து பலத்த காயமடைந்த குழந்தையைக் கண்ட அப்பகுதி மக்கள், ஆம்புலன்ஸுக்காகக் காத்திருக்காமல் உடனடியாகப் மோட்டார் சைக்கிளில் குழந்தையைத் தூக்கிக்கொண்டு கோரமங்களாவில் உள்ள தனியார் மருத்துவமனைக்குக் விரைந்து சென்றனர். தீவிர சிகிச்சைப் பிரிவில் அனுமதிக்கப்பட்டுள்ள அக்குழந்தையின் நிலைமை கவலைக்கிடமாக உள்ளது. பெற்றோரின் சிறு கவனக்குறைவே இத்தகைய விபத்துகளுக்குக் காரணம் என்பதால், பால்கனி மற்றும் ஆபத்தான பகுதிகளில் சிறு குழந்தைகளை ஒருபோதும் தனியாக விடவேண்டாம் எனப் போலீசார் எச்சரித்துள்ளனர்.