“அவமானம் வந்தாலும் பரவாலை”…. சட்டசபையில் உணர்ச்சிவசப்பட்ட முதல்வர் விஜய்…. உதயநிதி வைத்த செக்….!

தமிழக சட்டப்பேரவையின் பட்ஜெட் கூட்டத்தொடரின் 3-வது நாளில், காவிரி மற்றும் மேகதாது விவகாரத்தைக் கையில் எடுத்து திமுக சார்பில் ஒத்திவைப்புத் தீர்மானம் கொண்டுவரப்பட்டது. பேரவையில் பேசிய எதிர்க்கட்சித் தலைவர் உதயநிதி ஸ்டாலின், மேகதாதுவில் அணை கட்ட கர்நாடக அரசு தீவிர நடவடிக்கை எடுத்து வரும் சூழலில், தமிழக அரசு காவிரி உரிமையை மீட்க என்ன நடவடிக்கை எடுத்துள்ளது என கேள்வி எழுப்பினார். மேலும், போதிய நீர்வரத்து இல்லாததால் குறுவை சாகுபடி முற்றிலுமாக பாதிக்கப்பட்டுள்ளதைச் சுட்டிக்காட்டிய அவர், காவிரி டெல்டாவை வறட்சிப் பகுதியாக அறிவிக்காதது ஏன் என்றும், பாதிக்கப்பட்ட விவசாயிகளுக்கு உரிய நிவாரணம் வழங்கிட அனைத்துக் கட்சிக் கூட்டத்தைக் கூட்டாதது ஏன் என்றும் காரசாரமான வினாக்களை முன்வைத்தார்.

தொடர்ந்து பேசிய எதிர்க்கட்சித் தலைவர், காவிரி உரிமைகளுக்காக அனைத்துக் கட்சி நாடாளுமன்ற உறுப்பினர்களுடன் பிரதமரை நேரில் சந்திக்காதது குறித்தும், தமிழக முதலமைச்சரின் கர்நாடகப் பயணம் தொடர்பாக அமைச்சர்கள் தெரிவித்த முரண்பாடான தகவல்கள் குறித்தும் விளக்கம் கோரினார். ‘தமிழக முதல்வர் கர்நாடகா வர வேண்டாம்’ என்று அம்மாநில முதல்வர் கூறியதாக வெளியான தகவலின் உண்மைத் தன்மையைக் கேட்டு வலியுறுத்தினார். இவிவாதத்தின் போது, அரசின் வியூகங்கள் குறித்த பேச்சுகளுக்கு சபாநாயகர் ஆட்சேபம் தெரிவித்து, கவன ஈர்ப்பு நேரம் முடிவுக்கு வந்ததால் மேலும் பேச அனுமதி மறுத்த நிலையிலும், காவிரி பிரச்சனை தொடர்பான விவாதம் அவையில் சூடுபிடித்தது.

எதிர்க்கட்சியினரின் கேள்விகளுக்குப் பதிலளித்துப் பேசிய முதலமைச்சர் விஜய், காவிரி விவகாரத்தில் தமிழக அரசு துளியும் அரசியல் செய்ய விரும்பவில்லை என்று திட்டவட்டமாகத் தெரிவித்தார். மேகதாது அணைக்கு எதிராகச் சட்டமன்றத்தில் நிறைவேற்றப்பட்ட தீர்மானம் பிரதமருக்கு அனுப்பி வைக்கப்பட்டுள்ளதாகக் குறிப்பிட்ட அவர், காவிரியில் தமிழகத்திற்குள்ள உரிமையை அரசு ஒருபோதும் விட்டுக் கொடுக்காது என உறுதி அளித்தார். பேச்சுவார்த்தை மூலம் நல்ல தீர்வு கிடைக்கும் என்ற நம்பிக்கையிலேயே கர்நாடகா செல்லத் திட்டமிட்டதாகவும், தமிழக மக்களின் நலனுக்காக அங்கு ஏதேனும் அவமானம் நேர்ந்தால் கூட அதைத் தான் ஏற்றுக்கொள்ளத் தயார் என்றும் உணர்வுப்பூர்வமாகப் பதிலளித்தார்.

மேலும், காவிரி விவகாரத்தில் மத்திய அமைச்சர் நாடாளுமன்றத்தில் முழு உண்மையையும் தெரிவிக்கவில்லை என்று சுட்டிக்காட்டிய முதலமைச்சர், 1969-ல் கர்நாடகா அணை கட்ட அனுமதித்தது யார் என்பது போன்ற பழைய வரலாறுகளைப் பேசி ‘மலிவான அரசியல்’ செய்யத் தான் விரும்பவில்லை என்றார். அரசியல் எல்லைகளைத் தாண்டி காவிரிப் பிரச்சனைக்கு சுமுகமான மற்றும் நிரந்தரத் தீர்வைக் காண்பதே அரசின் முதன்மை நோக்கம் என்றும், அதற்காகவே பெங்களூரு சென்று பேச்சுவார்த்தை நடத்த முயன்றதாகவும் முதலமைச்சர் பேரவையில் தெளிவுபடுத்தினார்.