தமிழகத்தில் வரவிருக்கும் 2026 சட்டமன்றத் தேர்தலை ஒட்டி அரசியல் களம் தற்போதே சூடுபிடிக்கத் தொடங்கியுள்ளது. குறிப்பாக, திமுக தலைமையிலான கூட்டணியில் தொகுதிப் பங்கீடு மற்றும் ஆட்சி அதிகாரம் குறித்த விவாதங்கள் எழுந்துள்ளன. கூட்டணியில் இடம்பெற்றுள்ள காங்கிரஸ் கட்சி, இந்த முறை தங்களுக்கு ஆட்சியில் பங்கு வேண்டும் என்றும், கூடுதல் தொகுதிகள் ஒதுக்கப்பட வேண்டும் என்றும் வலியுறுத்தி வருவதாகத் தகவல்கள் தெரிவிக்கின்றன.
இந்த நிலையில், தனியார் செய்தி நிறுவனம் நடத்திய கருத்தரங்கு ஒன்றில் பங்கேற்ற முதலமைச்சர் மு.க. ஸ்டாலின், கூட்டணி கட்சிகளின் இந்த எதிர்பார்ப்பு குறித்து தனது கருத்தைத் தெளிவுபடுத்தியுள்ளார். தமிழகத்தில் தற்போதுள்ள அரசியல் சூழலில் “ஆட்சியில் பங்கு” என்பது ஒத்து வராத ஒன்று என அவர் சூசகமாகத் தெரிவித்துள்ளார். இதன் மூலம் காங்கிரஸ் உள்ளிட்ட கூட்டணிக் கட்சிகளின் அதிகாரப் பகிர்வு ஆசைக்கு அவர் முற்றுப்புள்ளி வைத்துள்ளதாக அரசியல் வட்டாரங்கள் கருதுகின்றன.
தனது உரையில் திமுக அரசின் சாதனைகளைப் பட்டியலிட்ட முதலமைச்சர், தமிழகம் கடந்த ஐந்து ஆண்டுகளில் வரலாற்றுச் சிறப்புமிக்க வளர்ச்சிப் பாதையில் சென்று கொண்டிருப்பதாகக் குறிப்பிட்டார். பொருளாதார வளர்ச்சியில் தமிழகம் 11.19 சதவீதத்தை எட்டியுள்ளது என்றும், பல்வேறு கல்வி மற்றும் சமூக நலப் புள்ளிவிவரங்களில் மாநிலம் முன்னணியில் இருப்பதாகவும் அவர் பெருமிதம் தெரிவித்தார். மேலும், மத்திய அரசு தமிழகத்தைப் புறக்கணித்தாலும், திமுக அரசு மக்களுக்கான திட்டங்களைத் தொடர்ந்து செயல்படுத்தி வருவதாக அவர் கூறினார்.
கூட்டணி குறித்துப் பேசிய அவர், வரும் பிப்ரவரி 22-ஆம் தேதி முதல் கூட்டணி கட்சிகளுடன் தொகுதிப் பங்கீடு தொடர்பான பேச்சுவார்த்தைகள் அதிகாரப்பூர்வமாகத் தொடங்கும் என்று அறிவித்தார். ஆட்சியில் பங்கு அளிக்க முடியாது என்பதை மறைமுகமாக உணர்த்தியுள்ள முதலமைச்சர், அதே சமயம் மக்கள் நலனுக்காகத் திமுக எப்போதும் உறுதியுடன் செயல்படும் என்றும், வரவிருக்கும் தேர்தலில் கூட்டணி கட்சிகளுடன் இணைந்து மாபெரும் வெற்றியைப் பதிவு செய்வோம் என்றும் நம்பிக்கை தெரிவித்துள்ளார்.