“இந்த ஸ்டாலின் தன்மானத்துக்காக நெருப்போடு கூட விளையாடுவான்… ஜாக்கிரதை… வேட்பாளர்களை ஆதரித்து முதல்வர் கடும் எச்சரிக்கை..!!

வேலூர் மாவட்டம் கந்தனேரியில் நடைபெற்ற தேர்தல் பிரசார பொதுக்கூட்டத்தில், திமுக தலைமையிலான மதச்சார்பற்ற முற்போக்கு கூட்டணி வேட்பாளர்களை ஆதரித்து தமிழக முதல்வர் மு.க.ஸ்டாலின் உரையாற்றினார். அமைச்சர் துரைமுருகன் உட்பட வேலூர் மற்றும் சுற்றுவட்டாரத் தொகுதி வேட்பாளர்களுக்கு வாக்கு சேகரித்த அவர், “தமிழ்நாட்டின் தன்மானத்தைக் காக்க ஸ்டாலின் எப்போதும் களத்தில் நிற்பான்” என்று முழங்கினார். எதிர்தரப்பினரை எச்சரிக்கும் வகையில், “யாரும் நெருப்போடு விளையாட வேண்டாம்” என்று குறிப்பிட்ட முதல்வர், இந்தத் தேர்தலின் முக்கியத்துவத்தை மக்கள் உணர வேண்டியது அவசியம் என்று வலியுறுத்தினார்.

தொடர்ந்து பேசிய முதல்வர் ஸ்டாலின், இந்தியா சுதந்திரம் அடைந்த காலக்கட்டத்தில் நிலவிய பசி மற்றும் வறுமைச் சூழலை நினைவுகூர்ந்தார். அந்த இக்கட்டான நிலையிலிருந்து நாட்டை மீட்டெடுக்கப் பல போராட்டங்கள் நடத்தப்பட்டதைச் சுட்டிக்காட்டிய அவர், தற்போதைய அரசியல் சூழலில் தமிழகத்தின் உரிமைகளை மீட்டெடுக்க இந்தத் தேர்தல் ஒரு மிகப்பெரிய களமாக அமைந்துள்ளதாகத் தெரிவித்தார். திமுக கூட்டணி வேட்பாளர்களுக்கு மக்கள் பெரும் ஆதரவை வழங்கி, தமிழகத்தின் முன்னேற்றத்திற்கும் தன்மானத்திற்கும் வலுசேர்க்க வேண்டும் என அவர் தனது உரையில் வேண்டுகோள் விடுத்தார்.