“ஓட ஓட விரட்டி வெட்டு!” – 48 மணி நேரத்தில் நடந்த 3 பகீர் சம்பவங்கள்…மதுரையை உலுக்கும் தொடர் படுகொலைகள்…!!

மதுரை மாநகரில் அடுத்தடுத்து அரங்கேறியுள்ள மூன்று கொலைச் சம்பவங்கள் மக்கள் மத்தியில் பெரும் பீதியையும் அதிர்ச்சியையும் ஏற்படுத்தியுள்ளன. குற்றங்களைத் தடுக்கும் நோக்கில் காவல்துறையினர் வாகனத் தணிக்கை மற்றும் ரோந்துப் பணிகளை தீவிரப்படுத்தியிருந்த போதிலும், குறுகிய கால இடைவெளியில் நடந்தேறியுள்ள இந்தத் தொடர் கொலைகள் சட்டம் ஒழுங்கு குறித்த அச்சத்தை அதிகரித்துள்ளன.

சோலையழகுபுரம் பகுதியைச் சேர்ந்த சரித்திரப் பதிவேடு குற்றவாளியான மணி, மதுபோதையில் ஏற்பட்ட தகராறில் அவரது நண்பர் திவாகரால் வெட்டிக் கொல்லப்பட்டார். மற்றொரு சம்பவத்தில், நீதிமன்ற விசாரணை முடிந்து திரும்பிய சிந்தாமணியைச் சேர்ந்த முருகன் என்பவரை நான்கு பேர் கொண்ட மர்ம கும்பல் ஓட ஓட விரட்டிப் படுகொலை செய்துள்ளது. இது தவிர, கூடல்புதூர் பகுதியில் நண்பர்களுடன் மது அருந்திக் கொண்டிருந்த ஷிரிப்பிக்ராஜன் என்ற இளைஞர், பணப் பரிவர்த்தனை தொடர்பான வாக்குவாதத்தில் நண்பர்களாலேயே கிரிக்கெட் மட்டையால் அடித்துக் கொல்லப்பட்டுள்ளார்.

மதுபோதையில் ஏற்பட்ட மோதல்களாலும், முன்விரோதத்தின் காரணமாகவும் இந்த உயிர்ப்பலிகள் நிகழ்ந்துள்ளதால், காவல் துறையினர் கூடுதல் கவனம் செலுத்த வேண்டிய கட்டாயம் ஏற்பட்டுள்ளது. எனவே, மக்களின் பாதுகாப்பை உறுதி செய்யும் வகையில் இரவு நேர ரோந்துப் பணிகளைப் பன்மடங்கு அதிகப்படுத்த வேண்டும் எனவும், குற்றப் பின்னணி கொண்டவர்களைத் தீவிரமாகக் கண்காணித்துத் தகுந்த முன்னெச்சரிக்கை நடவடிக்கைகளை எடுக்க வேண்டும் எனவும் பொதுமக்கள் தரப்பில் வலுவான கோரிக்கை முன்வைக்கப்பட்டுள்ளது.