ஒரே இரவில் மாறிய ‘நான் முதல்வன்’… டிஜிட்டல் அடையாளங்கள் அனைத்தும் ‘டெலிட்’ செய்த விஜய்…. திமுகவின் ‘கனவுத் திட்டம்’ காலி…!

தமிழ்நாட்டில் ஆட்சி மாற்றங்கள் நிகழும் போதெல்லாம் முந்தைய அரசின் திட்டங்களின் பெயர்களை மாற்றுவதும், அவர்களின் விளம்பரங்களை நீக்குவதும் அரசியல் களத்தில் தொடர்கதையாகவே இருந்து வருகிறது. அந்த வகையில், கடந்த திமுக ஆட்சிக்காலத்தில் மாணவர்களின் திறன் மேம்பாட்டிற்காகத் தொடங்கப்பட்டு, இளைஞர்களிடையே பெரும் விழிப்புணர்வை ஏற்படுத்திய ‘நான் முதல்வன்’ திட்டம் தற்போது கடுமையான மாற்றங்களுக்கு உள்ளாகி வருகிறது. இத்திட்டத்தின் அதிகாரப்பூர்வ சமூக ஊடகப் பக்கங்களில் இருந்து பழைய அடையாளங்கள் முற்றிலுமாக அழிக்கப்பட்டிருப்பது தற்போதைய அரசியல் மற்றும் கல்வி வட்டாரங்களில் பெரும் விவாதப் பொருளாக மாறியுள்ளது.

முன்னாள் முதல்வர் மு.க.ஸ்டாலினின் கனவுத் திட்டமாகத் தொடங்கப்பட்ட ‘நான் முதல்வன்’ என்ற பெயர், தற்போது அதன் அதிகாரப்பூர்வ எக்ஸ் கணக்கில் இருந்து நீக்கப்பட்டுள்ளது. அதற்குப் பதிலாக ‘TN Skill Corporation’ என்று பெயர் மாற்றம் செய்யப்பட்டுள்ளது. வெறும் பெயர் மாற்றத்தோடு மட்டுமில்லாமல், கணக்கின் முகப்புப் படம், முகப்புப் பேனர் ஆகியவையும் முந்தைய அரசின் விளம்பரங்கள் நீக்கப்பட்டு புதிய பாணியில் மாற்றியமைக்கப்பட்டுள்ளன. இதனை ஒரு தூய்மையான திறன் மேம்பாட்டுத் திட்டமாகத் தொடரவே பழைய அரசியல் சார்ந்த பதிவுகள் நீக்கப்பட்டுள்ளதாக அரசுத் தரப்பில் சொல்லப்படுகிறது.

இருப்பினும், முந்தைய ஆட்சிக்காலத்தில் இத்திட்டம் குறித்துப் பதிவிடப்பட்ட அனைத்துப் பழைய தரவுகளும், வீடியோக்களும் சமூக வலைதளப் பக்கத்தில் இருந்து முழுமையாக நீக்கப்பட்டிருப்பது அதிர்ச்சியை ஏற்படுத்தியுள்ளது. முன்னாள் முதலமைச்சர் மற்றும் அப்போதைய அமைச்சர்கள் கலந்துகொண்டு திட்டத்தைத் தொடங்கி வைத்த வீடியோக்கள், மாணவர்களுடனான கலந்துரையாடல்கள், புகைப்படங்கள் என அனைத்தும் டிஜிட்டல் தளத்தில் இருந்து துடைத்தெறியப்பட்டுள்ளன. மாணவர்களிடம் நல்ல வரவேற்பைப் பெற்ற ஒரு திட்டத்தின் வரலாற்றுப் பதிவுகள் இவ்வாறு முற்றிலும் அழிக்கப்பட்டிருப்பது திமுகவினரிடையேயும், நடுநிலையாளர்களிடையேயும் அதிருப்தியை ஏற்படுத்தியுள்ளது.

சாதாரண மக்களிடையே இத்திட்டம் பெரிய அளவில் சென்றடையவில்லை என்றாலும், மாணவர்களின் வேலைவாய்ப்பு, திறன் மேம்பாடு, வழிகாட்டுதல் மற்றும் யுபிஎஸ்சி போன்ற போட்டித் தேர்வுகளுக்குத் தயாராகும் மாணவர்களுக்கு இது மிகப்பெரிய பலனாக இருந்து வந்தது. கடந்த ஆண்டில் மட்டும் சுமார் 50-க்கும் மேற்பட்ட மாணவர்கள் இத்திட்டத்தின் மூலம் பயனடைந்துள்ளனர். எதிர்காலத்தில் இளைஞர்களின் வளர்ச்சிக்கு வழிகாட்டக்கூடிய இத்தகைய முக்கியமான திட்டத்தின் பெயரை மாற்றுவதும், அதன் டிஜிட்டல் அடையாளங்களை அழிப்பதும் ஆரோக்கியமான அரசியல் பண்பாடா என்ற கேள்வியும், விவாதமும் தற்போது தமிழகத்தில் வலுவாக எழுந்துள்ளது.