புதிய சிக்கல்..! “இவர்களுக்கு 45 நாளுக்கு ஒருமுறையே சிலிண்டர்” வீட்டு கேஸ் சிலிண்டர் புக் செய்வதில் மாற்றம்… அதிர்ச்சியில் இல்லத்தரசிகள்…!!

நாடு முழுவதும் பல்வேறு மாநிலங்களில் சமையல் எரிவாயு (LPG) சிலிண்டர்களுக்கு கடும் தட்டுப்பாடு ஏற்பட்டுள்ளது மக்களிடையே பெரும் அதிர்ச்சியை ஏற்படுத்தியுள்ளது. குறிப்பாக வணிக பயன்பாட்டிற்கான சிலிண்டர்கள் தாராளமாக கிடைக்காததால், உணவகங்கள் மற்றும் சிறு தொழில் நிறுவனங்கள் கடுமையாக பாதிக்கப்பட்டுள்ளன. போதிய எரிவாயு இருப்பு இல்லாத காரணத்தால் பல பகுதிகளில் ஹோட்டல்கள் தற்காலிகமாக மூடப்பட்டுள்ளன. இதனால் உணவகங்களை நம்பியிருக்கும் பொதுமக்களும், வாழ்வாதாரத்தை இழக்கும் தொழிலாளர்களும் பெரும் கவலையில் ஆழ்ந்துள்ளனர்.

வணிக சிலிண்டர்கள் மட்டுமன்றி, வீட்டு உபயோக சிலிண்டர்களுக்கும் தட்டுப்பாடு நீடிப்பதால் பொதுமக்கள் பல வாரங்களாக காத்திருக்கும் சூழல் உருவாகியுள்ளது. சிலிண்டர் முன்பதிவு செய்தும் விநியோகம் செய்யப்படாமல் தாமதமாவது அன்றாட சமையல் பணிகளை முடக்கியுள்ளது. நகர்ப்புறங்களை விட கிராமப்புறங்களில் இந்த பாதிப்பு மிகத் தீவிரமாக உள்ளது. விறகு அடுப்புகளுக்கு மாறியுள்ள பல குடும்பங்கள், இந்த தட்டுப்பாடு எப்போது நீங்கும் என்ற எதிர்பார்ப்பில் உள்ளனர்.

இதற்கிடையே, சிலிண்டர் விநியோக முறையில் மத்திய அரசு அதிரடி மாற்றம் செய்துள்ளதாகத் தகவல்கள் வெளியாகியுள்ளன. குறிப்பாக கிராமப்புறங்களில் 25 நாட்களுக்கு ஒருமுறை சிலிண்டர் புக்கிங் செய்யும் நடைமுறை மாற்றப்பட்டு, இனி 45 நாட்களுக்கு ஒருமுறை மட்டுமே முன்பதிவு செய்ய முடியும் எனத் தெரிகிறது. இந்த கால அவகாசம் நீட்டிக்கப்பட்டுள்ளதால், பெரிய குடும்பங்கள் பெரும் நெருக்கடியைச் சந்திக்கும் அபாயம் ஏற்பட்டுள்ளது. அரசின் இந்த மறைமுகக் கட்டுப்பாடு பொதுமக்கள் மத்தியில் கடும் கொந்தளிப்பை ஏற்படுத்தியுள்ளது.