மலைச்சாலையில் அஜாக்கிரதையா…? 300 அடி ஆழத்தில் கவிழ்ந்த கார்… துடிதுடித்து பலியான வாலிபர்… பெரும் சோகம்…!!

சென்னையைச் சேர்ந்த முகமது கயாத் (30) என்பவர் தனது நண்பர்கள் ஐந்து பேருடன் கொடைக்கானலுக்குச் சுற்றுலா சென்றுள்ளார். இன்று காலை அவர்கள் பூம்பாறை சாலையில் காரில் பயணம் செய்தபோது, பழனி வியூ பாயிண்ட் அருகே எதிர்பாராதவிதமாக ஓட்டுநரின் கட்டுப்பாட்டை இழந்த கார், சுமார் 300 அடி ஆழமுள்ள மலைப்பள்ளத்தில் தலைகுப்புறக் கவிழ்ந்து விபத்துக்குள்ளானது. இந்த கோர விபத்தில் இடிபாடுகளுக்குள் சிக்கிய முகமது கயாத் சம்பவ இடத்திலேயே பரிதாபமாக உயிரிழந்தார். தகவல் அறிந்து வந்த தீயணைப்புத் துறையினர் மற்றும் போலீசார், உயிருக்குப் போராடிக்கொண்டிருந்த மற்ற 5 பேரையும் மீட்டு சிகிச்சைக்காகக் கொடைக்கானல் அரசு மருத்துவமனைக்கு அனுப்பி வைத்தனர்.

தற்போது கோடைக்காலம் தொடங்கி சுற்றுலாப் பயணிகளின் வருகை அதிகரித்துள்ள நிலையில், மலைச்சாலையில் நிகழ்ந்த இந்த விபத்து பெரும் சோகத்தை ஏற்படுத்தியுள்ளது. விபத்தில் காயமடைந்தவர்களின் விபரங்களைச் சேகரித்து வரும் போலீசார், இது குறித்து வழக்குப் பதிவு செய்து தீவிர விசாரணை நடத்தி வருகின்றனர். மலைப்பாதைகளில் வாகனங்களை இயக்கும்போது ஓட்டுநர்கள் கூடுதல் கவனத்துடனும், வேகக் கட்டுப்பாட்டுடனும் செல்ல வேண்டும் எனப் போக்குவரத்துப் போலீசார் அறிவுறுத்தியுள்ளனர். மேலும், சுற்றுலாப் பயணிகளின் பாதுகாப்பை உறுதி செய்யத் தேவையான வழிகாட்டு நெறிமுறைகளை அதிகாரிகள் முறையாக வழங்க வேண்டும் எனச் சமூக ஆர்வலர்கள் கோரிக்கை விடுத்துள்ளனர்.