“ஐயோ யாரோ என் பொண்டாட்டி கழுத்தை அறுத்துட்டாங்க”… நள்ளிரவில் கத்திய கணவன்… அடுத்து வெளிவந்த திடுக்கிடும் உண்மை….!

ஹரியானா மாநிலம் பகதூர்கட்டில், காதலர் தின கொண்டாட்டத்திற்குப் பிறகு நடந்த ஒரு கோரமான கொலைச் சம்பவம் பெரும் அதிர்ச்சியை ஏற்படுத்தியுள்ளது. குருகிராமில் பட்டயக் கணக்காளராக பணியாற்றும் அன்ஷுல் தவான் என்பவர், எச்டிஎப்சி வங்கியில் பணியாற்றி வந்த தனது மனைவி மஹக்கை, காதலர் தினத்தை ஒன்றாகக் கொண்டாடி முடித்த அன்றே கத்தரிக்கோலால் குத்திக் கொலை செய்துள்ளார்.

கடந்த ஞாயிற்றுக்கிழமை இரவு 11 மணியளவில், அடையாளம் தெரியாத மர்ம நபர்கள் கொள்ளை முயற்சியின் போது தனது மனைவியின் கழுத்தை அறுத்துவிட்டதாகக் கூறி அன்ஷுல் நாடகமாடினார். இதுகுறித்து தகவலறிந்த ஜாஜ்ஜர் காவல்துறையினர் சம்பவ இடத்திற்கு விரைந்து வந்து விசாரணை மேற்கொண்டனர். சுமார் 18 மணி நேரத் தீவிர விசாரணைக்குப் பிறகு, அன்ஷுல் முன்னுக்குப் பின் முரணாகப் பேசியதால் காவல்துறையினருக்கு அவர் மீது சந்தேகம் வலுத்தது.

விசாரணையில், அன்ஷுல் தனது மனைவியின் நடத்தையில் சந்தேகம் கொண்டு இந்தத் திட்டமிட்ட கொலையைச் செய்தது வெளிச்சத்திற்கு வந்தது. கைரேகைகள் சிக்காமல் இருக்கக் கையுறைகளை அணிந்து கொண்டு, முதலில் மஹக்கின் கழுத்தை நெரித்துக் கொன்றுவிட்டு, பின்னர் கத்தரிக்கோலால் அவர் கழுத்தை அறுத்துக் கொடூரத்தை அரங்கேற்றியுள்ளார். குற்றத்தை மறைக்க அவர் செய்த தந்திரங்கள் எடுபடாமல் காவல்துறையினரிடம் வசமாக மாட்டிக்கொண்டார்.

கடந்த ஆண்டு செப்டம்பர் மாதம் தான் இவர்களுக்குத் திருமணம் நடந்துள்ளது. மணம் முடித்த ஐந்தே மாதங்களில், சந்தேகப் பேயால் ஒரு இளம் பெண்ணின் வாழ்க்கை பறிபோயிருப்பது அப்பகுதி மக்களிடையே பெரும் சோகத்தை ஏற்படுத்தியுள்ளது. தற்போது அன்ஷுலை காவல்துறையினர் கைது செய்து சிறையில் அடைத்துள்ளனர். ஒரு படித்த நபர் இத்தகைய பாதகச் செயலில் ஈடுபட்டது சமூக வலைதளங்களில் விவாதப் பொருளாகியுள்ளது.