உணர்வுகளை மதிக்காத இடத்தில் பயணம் சாத்தியமா..? அதிமுக எம்.எல்.ஏ.க்கள் தகுதிநீக்க விவகாரம்.. சி.விஜயபாஸ்கரின் எக்ஸ் பதிவு பரபரப்பு..!!

தமிழக சட்டமன்றத் தேர்தலில் தமிழக வெற்றிக் கழகம் அதிக இடங்களைக் கைப்பற்றி ஆட்சியைக் பிடித்தது. இந்தத் தேர்தலில் அதிமுக 3-வது இடத்திற்குத் தள்ளப்பட்டதால், அக்கட்சியின் பொதுச்செயலாளர் எடப்பாடி பழனிசாமிக்கு எதிராக முன்னாள் அமைச்சர்கள் சி.வி.சண்முகம், எஸ்.பி.வேலுமணி தலைமையில் தனி அணி உருவானது. சட்டசபையில் நடந்த நம்பிக்கை வாக்கெடுப்பில் இந்த அணியைச் சேர்ந்த 25 எம்.எல்.ஏ.க்கள் த.வெ.க. அரசுக்கு ஆதரவாக வாக்களித்தனர்.

இதனைத் தொடர்ந்து, தங்களுக்கு ஆதரவாக வாக்களித்த 25 எம்.எல்.ஏ.க்களை தகுதிநீக்கம் செய்ய எடப்பாடி பழனிசாமி தரப்பு சபாநாயகரிடம் மனு கொடுத்தது. இதற்கிடையே, 4 அதிமுக எம்.எல்.ஏ.க்கள் தங்கள் பதவியை ராஜினாமா செய்துவிட்டு த.வெ.க.வில் இணைந்தனர். நீண்ட இழுபறிக்குப் பின்னர், மற்ற 21 எம்.எல்.ஏ.க்களும் மன்னிப்பு கடிதம் கொடுத்ததால் அவர்கள் மீதான நடவடிக்கையை எடப்பாடி பழனிசாமி திரும்பப் பெற நடவடிக்கை எடுத்தார். எனினும், அதிமுகவில் இருந்து முன்னாள் அமைச்சர்கள் மற்றும் நிர்வாகிகள் பலர் தொடர்ந்து விலகி த.வெ.க.வில் இணைந்து வருகிறார்கள்.

இந்த அரசியல் சூழ்நிலைக்கு மத்தியில், அதிமுக முன்னாள் அமைச்சர் சி.விஜயபாஸ்கர் எக்ஸ் தளத்தில் அதிமுக பொதுச்செயலாளர் எடப்பாடி பழனிசாமியை மறைமுகமாக விமர்சித்து ஒரு பதிவை வெளியிட்டுள்ளார். அதில், “தலைமை என்பது அதிகாரமோ, ஆணவமோ அல்ல… அர்ப்பணிப்பு மிகுந்த அரவணைப்பு; உழைக்கும் தொண்டர்களின் மனதை வெல்ல முடியாத தலைமை, மக்களின் மனதை எப்படி வெல்லும்? உணர்வுகளை மதிக்காத இடத்தில் உண்மையான பயணம் சாத்தியமா?” என்று அவர் குறிப்பிட்டுள்ளார்.