விழுப்புரம் மாவட்ட அதிமுகவில் நிலவி வந்த அதிகாரப் போட்டி தற்பொழுது முடிவுக்கு வந்து, புதிய தலைமைப் பொறுப்பேற்றுள்ளது அரசியல் வட்டாரத்தில் பேசுபொருளாகியுள்ளது. விழுப்புரம் மாவட்ட அதிமுகவின் முக்கியப் புள்ளியான சி.வி.சண்முகத்தின் கைவசம் இருந்த அதிகாரம் தற்பொழுது அவரை விட்டு நழுவியுள்ளது. கட்சியின் பொதுச்செயலாளர் எடப்பாடி பழனிசாமியால் புதிய மாவட்ட செயலாளராக நியமிக்கப்பட்ட பசுபதி தரப்பிடம், விழுப்புரம் அதிமுக அலுவலகத்தின் சாவி முறைப்படி ஒப்படைக்கப்பட்டுள்ளது.
முன்னதாக, இரு தரப்பினரிடையே ஏற்பட்ட கருத்து வேறுபாடுகளால் அலுவலகத்தைப் பயன்படுத்துவதில் இழுபறி நீடித்து வந்தது. இந்த நிலையில், சி.வி.சண்முகத்தின் தரப்பிலிருந்து எவ்வித எதிர்ப்பும் தெரிவிக்கப்படாமல், கட்சி அலுவலக ஊழியர் மூலம் சாவி பசுபதியின் இல்லத்திற்கே கொண்டு சென்று வழங்கப்பட்டுள்ளது. இதனைத் தொடர்ந்து, ஆக்ரோஷமான அரசியலுக்குப் பெயர் போன சி.வி.சண்முகம் இந்த விவகாரத்தில் அமைதி காப்பதுடன், அலுவலகத்தில் இருந்த அவரது பேனர்களும் அகற்றப்பட்டுள்ளது தொண்டர்களிடையே ஆச்சரியத்தையும் விவாதத்தையும் ஏற்படுத்தியுள்ளது.