அதிமுக பொதுச் செயலாளர் எடப்பாடி பழனிசாமியின் தலைமை மற்றும் செயல்பாடுகள் குறித்து அக்கட்சியின் மூத்த தலைவரும் முன்னாள் அமைச்சருமான சி.வி.சண்முகம் திண்டிவனத்தில் செய்தியாளர்களைச் சந்தித்து கடுமையான விமர்சனங்களை முன்வைத்துள்ளார். சமீபத்திய தேர்தல் தோல்விகளுக்கு எடப்பாடி பழனிசாமியே முழு பொறுப்பு என்று சாடிய அவர், கட்சியின் தொடர் வீழ்ச்சியைத் தடுக்க உடனடியாக பொதுக்குழு அல்லது செயற்குழுவைக் கூட்ட வேண்டும் என்று வலியுறுத்தினார். மேலும், கேள்வி கேட்பதற்காக உருவாக்கப்பட்ட அதிமுகவில், இன்று எதையும் கேட்க முடியாத ஒரு சூழ்நிலை நிலவுவதாகவும், கட்சி ஒரு தனி குடும்பத்தின் பிடிக்குள் சென்று கொண்டிருப்பதாகவும் அவர் வேதனை தெரிவித்தார்.
குறிப்பாக, எடப்பாடி பழனிசாமியின் மகன் மிதுனுக்கு கட்சியில் முக்கிய பொறுப்பு வழங்க வேண்டும் என்று நிர்வாகிகள் மத்தியில் எழுந்துள்ள கோரிக்கைகள் ஒரு திட்டமிட்ட நாடகம் என்று சி.வி.சண்முகம் குற்றம் சாட்டியுள்ளார். யார் வேண்டுமானாலும் அரசியலுக்கு வரலாம் என்பதில் மாற்றுக் கருத்து இல்லை என்று குறிப்பிட்ட அவர், ஆனால் தனது மகனை அரசியலுக்குள் கொண்டு வருவதற்காக எடப்பாடி பழனிசாமி நிர்வாகிகள் அழைப்பது போல டிராமா போடுவதாகச் சாடினார். கடந்த 1996-ல் தேர்தல் தோல்வி ஏற்பட்ட போது, மறைந்த முன்னாள் முதல்வர் ஜெயலலிதா அதற்குத் தானே பொறுப்பேற்று, அதிருப்தியாளர்களை அரவணைத்துச் சென்ற வரலாற்றைச் சுட்டிக்காட்டிய சண்முகம், இபிஎஸ் தோல்விகளுக்குப் பொறுப்பேற்க மறுப்பதுடன் தவறுகளைத் திருத்திக் கொள்ளவும் தயாராக இல்லை என்றார்.
தேர்தல் கூட்டணி மற்றும் முடிவுகள் குறித்துப் பேசிய சி.வி.சண்முகம், “நடந்து முடிந்த தேர்தலில் அதிமுக 47 தொகுதிகளில் வென்றதாக மார்தட்டிக் கொள்கிறது; ஆனால், அந்த 47-ல் 31 தொகுதிகளில் பெற்ற வெற்றி என்பது கூட்டணியில் இருந்த பாமக போட்ட பிச்சை” என்று மிகக் கடுமையான வார்த்தைகளால் விமர்சித்தார். பாமக மட்டும் அதிமுக கூட்டணியில் இல்லாமல் இருந்திருந்தால், வெறும் 7 அல்லது 8 தொகுதிகளில் மட்டுமே அதிமுக வென்றிருக்கும் என்றும் அவர் சுட்டிக்காட்டினார். மேலும், திமுகவை எதிர்ப்பதற்காகத் தொடங்கப்பட்ட அதிமுக, தேர்தல் முடிவுகளுக்குப் பிறகு திமுகவுடன் கூட்டணி வைத்து ஆட்சியைப் பிடிக்க எடப்பாடி பழனிசாமி யோசனை செய்ததாகவும், அதற்குத் தான் கடுமையாக எதிர்ப்புத் தெரிவித்ததாகவும் சண்முகம் ஒரு புதிய குண்டைத் தூக்கிப் போட்டார்.
அதிமுக தற்போது ஒரு சீட்டுக்கட்டைப் போலச் சரிந்து வருவதாக எச்சரித்த அவர், கட்சிக்காக உழைத்தவர்களும், பணத்தைச் செலவு செய்தவர்களும் வேதனையோடு வெளியேறி மாற்றுப் பாதையைத் தேடும் போது அவர்களைத் ‘துரோகிகள்’ என்று சொல்வது நியாயமல்ல என்று வாதாடினார். சட்டமன்றத் தேர்தலுக்குப் பிறகு எடப்பாடி பழனிசாமிக்கு எதிராகச் சி.வி.சண்முகம் மற்றும் எஸ்.பி.வேலுமணி தலைமையில் உருவான அதிருப்தி அணியில் இருந்த வேலுமணி உள்ளிட்ட பலர் மீண்டும் இபிஎஸ் பக்கம் சாய்ந்துவிட்ட நிலையிலும், சி.வி.சண்முகம் மற்றும் சி.விஜயபாஸ்கர் ஆகியோர் இன்னும் தங்கள் தனித்துவமான எதிர்ப்பைப் பதிவு செய்து வருகின்றனர். ஆண்டுக்கு இருமுறை பொதுக்குழுவைக் கூட்ட வேண்டும் என்ற விதியைச் சுட்டிக்காட்டி, நடப்பு ஆண்டின் 6 மாதங்கள் கடந்தும் இன்னும் ஒரு கூட்டத்தைக் கூடக் கூட்டாதது ஏன் என்ற இவர்களின் கேள்வி அதிமுக வட்டாரத்தில் பெரும் பரபரப்பை ஏற்படுத்தியுள்ளது.
உத்தரப் பிரதேச மாநிலம் பிரோசாபாத் மாவட்டத்தில், தலித் சிறுமி ஒருவர் கூட்டுப்பாலியல் வன்கொடுமைக்குள்ளாக்கப்பட்டு, அதன்பின் கொல்லும் நோக்கில் கழுத்து அறுக்கப்பட்ட…
அமெரிக்காவில் உயர்கல்வி பயின்று வந்த தெலுங்கானா மாநிலத்தைச் சேர்ந்த 23 வயது மாணவி திடீரென மாயமான சம்பவம் அவரது குடும்பத்தினரிடையே…
குழந்தைகளைக் கண்காணிக்கத் தவறிவிட்டு, அனைத்துத் தவறுக்கும் மற்றவர்கள் மீது பழிபோடும் தற்காலப் பெற்றோரின் பொறுப்பற்ற போக்கு குறித்து சமூக வலைதளங்களில்…
ஏர் இந்தியா விமானத்தில் 6 அடி 8 அங்குல உயரம் கொண்ட நபர் கழிவறையைப் பயன்படுத்தும் போது படும் சிரமங்களை…
வயது வெறும் எண் மட்டுமே என்பதை மீண்டும் ஒருமுறை நிரூபிக்கும் வகையில், 78 வயதான பிரபல மூத்த பாடகி உஷா…
மும்பை வீதிகளில் மோட்டார் பொருத்தப்பட்ட சக்கர நாற்காலியில் அமர்ந்துகொண்டு, எவ்விதச் சோர்வுமின்றி உற்சாகமாகச் சொமேட்டோ உணவு விநியோகம் செய்துவரும் மாற்றுத்திறனாளி…